سرمایہ کاراں کوں چنگیاں سہولتاں اتے مراعات ڈیونڑ سانگے علاقائی ملکاں دے کامیاب سرمایہ کاری ماڈلز تے عمل کیتا ونجے، متوقع سرمایہ کاراں کیتے سرمایہ کاری اتے صنعتاں قائم کرنڑ اچ آسانی پیدا کرنڑسانگے خصوصی اقتصادی علاقیاں کوں بجلی، گیس اتے رابطہ سڑکاں ورگی سہولتاں ڈیونڑ دے عمل کوں وی تکھے کیتا ونجے وزیراعظم عمران خان دی خزانہ، منصوبہ بندی، تجارت ڈویژناں اتے سرمایہ کاری بورڈ کوں ہدایت

اسلام آباد ۔ 17 ستمبر (اے پی پی)وزیراعظم عمران خان خزانہ، منصوبہ بندی، تجارت ڈویژناں اتے سرمایہ کاری بورڈ کوں ہدایت کیتی ہے جوا وہ سرمایہ کاراں کوں چنگیاں سہولتاں اتے مراعات ڈیونڑ سانگے علاقائی ملکاں دے کامیاب سرمایہ کاری ماڈلز تے عمل کرنڑ، متوقع سرمایہ کاراں کیتے سرمایہ کاری اتے صنعتاں قائم کرنڑ اچ آسانی پیدا کرنڑسانگے خصوصی اقتصادی علاقیاں کوں بجلی، گیس اتے رابطہ سڑکاں ورگی سہولتاں ڈیونڑ دے عمل کوں وی تکھے کیتا ونجے ۔ ایہ ہدایات وزیراعظم منگل کوں اعلیٰ سطح دے اجلاس دی صدارت کریندے ہوئیں کیتیاں ۔اجلاس اچ صنعتی شعبیں اچ سرمایہ کاری کوں راغب کرنڑ دے نال کہیں بی جاءتوں پاکستان اچ یونٹ بنڑاونڑ سانگے ڈتی گی مراعات دا جائزہ گھدا گیا۔ اجلاس اچ وفاقی وزیر اقتصادی امور محمد حماد اظہر، وزیر منصوبہ بندی مخدوم خسرو بختیار، وزیر توانائی عمر ایوب خان، مشیر تجارت عبدالرزاق داﺅد، معاون خصوصی اطلاعات ڈاکٹر فردوس عاشق اعوان، چیئرمین سرمایہ کاری بورڈ سید زبیر حیدر گیلانی، سیکرٹری خزانہ، سیکرٹری خارجہ امور، سیکرٹری منصوبہ بندی، ممبر پالیسی ایف بی آر اتے بئے سینئر حکام شریک ہن۔ اجلاس کوں ڈسایا گیا جو پاکستان اچ خصوصی اقتصادی زونز سرمایہ کاری خاص کر چینی کمپنیاں کوں راغب کرنڑ دی ودھ ساری صلاحیت رکھیندن۔ ایہ وی ڈسایا گیا جو چین مختلف پاکستانی مصنوعات اچ وڈی دلچسپی ظاہر کیتی ہے ،جیندی وجہ نال ڈوہائیں ملکاں وچال تجارتی توازن چنگا تھیسی ۔ اجلاس کوں ڈسایا گیا جو سی پیک حکومت دی پہلی ترجیح ہے اتے سرمایہ کاری کوں راغب کرنڑ سانگے انفراسٹرکچر دی ترقی، توانائی اتے مواصلات دے شعبے خصوصی اہمیت رکھیندن۔ اجلاس اچ ڈسایا گیا جو چینی اتے روسی کمپنیاں پاکستان سٹیل ملز دی بحالی اچ دلچسپی ظاہر کیتی ہے ،اتے انہاں دی پیشکشاں دا جائزہ گھدا ویندا پئے۔ ایں موقع تے وزیراعظم عمران خان آکھیا جو پاکستان ہنڑ اقتصادی نمو د ے سدھے رستے تے ویندا پئے اتے سرمایہ کاری کوں راغب کرنڑ کیتے حکومت کاروبار اچ آسانی دے نال نال متوقع سرمایہ کاراں کوں مراعات وی ڈیسی۔