اسلام آباد ۔ 11 ستمبر (اے پی پی)وزیر خارجہ شاہ محمود قریشی آکھیے جومقبوضہ جموں و کشمیر اچ صورتحال وڈی تشویشناک ہے، ذرائع مواصلات تے پابندی دی وجہ نال حقیقت سامنڑے نی آندی پی ، ایں سلسلے اچ بین الاقوامی میڈیا اتے انسانی حقوق دی بین الاقوامی تنظیماں دا کردار تعریف دے قابل ہے، یورپی یونین دے ودھ سارے ملک ایجھی صورتحال دی نزاکت کوں سمجھدن ۔ پاکستان اتے بھارت وچال تریجھے فریق ولوں مصالحت ہی ہکوآپشن ہے، ملٹری آپشن افغانستان دے مسئلے دا حل کائنی۔ بدھ کوں جینوا اچ سوئیس ٹی وی کو ںانٹرویو ڈیندے ہوئیں وزیر خارجہ آکھیا جو مقبوضہ جموں و کشمیر اچ صورتحال ایجھی تشویشناک ہے جوذرائع مواصلات تے پابندی دی وجہ نال حقائق سامنے نی آندے پئے،لیکن ایں سلسلے اچ بین الاقوامی میڈیا اتے انسانی حقوق دی بین الاقوامی تنظیماں دا کردار تعریف دے قابل ہے۔انہاں آکھیا جو ودھ سارے یورپی یونین دے ملکاں ایجھی صورتحال دی نزاکت کوں سمجھدن لیکن اپنڑیاں سیاسی وجوہات پاروں آواز نی چیندے پئے ۔انہاں آکھای جوہندوستان کوں بین الاقوامی قوانین اتے اقوام متحدہ دی قرارداراں تے عملدرآمد کرنڑ پوسی ۔وزیر خارجہ آکھیا جو ہندوستان وختی مقبوضہ جموں و کشمیر توں کرفیو چاوے اتے لوکیں کوں جیونڑ دا حق ڈیوے۔ شاہ محمود قریشی آکھیا جو کشمیریاں دے بال سکول نی ونج سگدے پئے، مریضاں کوں طبی سہولتاں نی ملدیاں پئیاں۔شاہ محمود قریشی آکھیا جو جڈاں اساڈی حکومت اقتدار اچ آئی تا اساں ہندوستان کوں مذاکرات دی پیشکش کیتی لیکن ہندوستان کوئی مثبت جواب نی ڈتا ۔ہندوستان دی موجودہ حکومت آر ایس ایس دے ایجنڈے تے عمل پیرا ہے ،ایجھے حالات اچ مستقبل قریب اچ ڈو طرفہ مذاکرات دی کوئی صورت نی نظردی پی ،کیونجو ہندوستان ول ول اپنڑیں پوزیشن بدلدا پئے۔ایک سوال دے جواب اچ انہاں آکھیا جو پاکستان اتے بھارت وچال تریجھے فریق ولوں مصالحت ہی ہکو آپشن ہے۔انہاں آکھیا جو میکوں پتہ لگے جو سوس حکام ہندوستانی رہنماواں نال متوقع ملاقات اچ مقبوضہ کشمیر کوں ایجنڈے اچ شامل کیتے جیرھی جو چنگی گالھ ہے۔افغانستان توں متعلق وزیر خارجہ آکھیا جو طالبان دا مذاکرات دی میز تے آونڑ، القاعدہ اتے آئی ایس ایس توں لاتعلقی ظاہر کرنڑ ، طالبان داا یہ عندیہ ڈیونڑ جو افغانستان دی سرزمین امریکہ یا انہاں دے اتحادیاں دے خلاف دہشت گردانہ کارروائیاں اچ استعمال کائناں تھیسی،ا یہ ساری مثبت پیش رفت ہے۔انہاں آکھیا جو میڈے خیال اچ انہاں مذاکرات کوں بحال تھیونڑ چاہیدے،کیونجو ایندے نال انٹرا افغان مذاکرات دی راہ سدھی تھیسی، افغانستان اچ امن و استحکام دی امید پیدا تھیسی اتے ایہ مذاکرات یقینا آسان کائناں ہوسن ، لیکن مذاکرات کو ں موقع ملنڑ چاہیدے۔انہاں آکھیا جوطالبان دااپنڑاں ذہن اتے سوچ ہے،لیکن اساں خطے اچ امن قائم کرنڑ سانگے اپنڑاں مصالحانہ کردار ادا کیتے کیونجو اساں سمجھدوں جو ملٹری آپشن افغانستان دے مسلے دا حل کائنی اتے امریکہ وی اساڈی گالھ نال اتفاق کیتے ،ایں پاروں ساری پیش رفت تھی اتے مذاکرات شروع تھئے۔
