پشاور۔18ستمبر(اے پی پی) وزیر اعظم عمران خان پاک افغان طورخم بارڈر تے 24 گھنٹے کراسنگ ٹرمینل داباقاعدہ افتتاح کر ڈتے،جیندی مدد نال ڈوہائیں ملکاں وچال تجارت ودھسی ۔ وزیر اعظم عمران خان طورخم بارڈر تے 16 ارب روپے دی لاگت نال مکمل تھیونڑ آلے انٹیگریٹڈ ٹرانزٹ ٹریڈ منیجمنٹ سسٹم دا بدھ کوں باضابطہ افتتاح کرنڑ سانگے فیتہ کٹیا،جیں توں امیگریشن دی سہولتاں اچ آسانی تھیسی، ایندے علاوہ ایں توں تجارتی سرگرمیاں وی ودھسن ۔ وزیر اعظم عمران خان دا ہیلی پیڈ تے گورنر خیبرپختونخوا شاہ فرمان ، وزیراعلی محمود خان اتے خیبر پختونخوا حکومت دے بئے اعلی عہدیداراں استقبال کیتا۔ پاک افغان بارڈر طورخم کراسنگ ٹرمینل دی افتتاحی تقریب دے موقع تے وزیراعظم عمران خان کوں انٹیگریٹڈ ٹرانزٹ ٹریڈ منیجمنٹ سسٹم بارے خصوصی بریفنگ وی ڈتی گی۔ وزیر خارجہ شاہ محمود قریشی ، وزیر اعظم دے مشیر برائے اسٹیبلشمنٹ ارباب شہزاد وی انہاں دے کٹھے ہن۔ پاک افغان بارڈر طورخم تے 24 گھنٹے سروس ڈیونڑ سانگے وزیر اعظم ولوں کراسنگ ٹرمینل دا افتتاح پی ٹی آئی دی حکومت دا ہک اہم فیصلہ ہے ،جیرھاجو ڈوہائیں ملکاں وچال ڈوطرفہ تجارت کوں ہک نویں بلندی تے گھن ونجنڑ دے علاوہ معاشی ، صنعتی اتے زرعی ترقی اچ وی مددکریسی۔پاک افغان کر سنگ پو ائنٹ دی وجہ نال ہزاراں بندیاں کوں روزگار ملسی خاص کر ٹرانسپورٹ سیکٹر کوں ایں توں ودھ ساراے فائدے تھیسن۔ طورخم بارڈر ٹر مینل توں ڈوہائیں ملکاں وچال صنعتاں ، چھوٹے اتے وچلے درجے دے کاروبار، سرمایہ کاری اتے تجارت ودھسی۔ ایں طرح کراسنگ ٹر مینل توں وڈے پیمانے تے افغانی مریضاں کوں وی فائدہ تھیسی ۔فیڈرل بورڈ آف ریونیو (ایف بی آر)اتے پاکستان کسٹمز طورخم بارڈر ٹر مینل تے موجود لوکیں ، تاجراں اتے سامان دی سفری دستاویزات دی وختی کلیئرنس کیتے ٹرمینل تے اپنڑاں عملپ ودھا ڈتے۔ایں اہم فیصلے نال ڈوہائیں ملکاں اچ لائیو اسٹاک ، تعمیراتی صنعت ، ٹرانسپورٹ ، سرمایہ کاری ، تجارت اتے کاروباری سرگرمیاں سمیت سارے وڈے معاشی تے اقتصادی شعبیں کوں ودھارا ملسی۔
