اسلام آباد ۔ 11 ستمبر (اے پی پی) چیف جسٹس آصف سعید کھوسہ آکھیے جو کرپشن قنون دی حکمرانی اچ سبھ توں وڈی رکاوٹ ہے جیں قیام پاکستان توں عدالتی نظام کوں جکڑیا ہوئے ،جوڈیشل ایکٹیویزم دی بجائے سپریم کورٹ عملی اتے فعال جوڈیشلزم کوں ودھیندی پی ہے،جڈاں ضروری ہویا،عدالت سوموٹونوٹس گھنسی، ملک اچ ایجھا نظام قائم کرنڑ دی ضرورت ہے جیندے اچ کرپشن کیتے کوئی جاءنہ ہوئے ۔بدھ کوں نواں عدالتی سال شروع کرنڑ دے موقع تے تھیونڑ آلے تقریب توں خطاب کریندے ہوئیں چیف جسٹس آکھیا جو قنون دی حکمرانی اچ سبھ توں وڈی رکاوٹ کرپشن ہے جیں قیام پاکستان دے ویلھے توں عدالتی نظام کوں جکڑ یا ہوئے ۔انہاں آکھیا جو میکوں پتہ ہے سوسائٹی دا ہک طبقہ جوڈیشل ایکٹیویزم اچ عدم دلچسپی تے ناخوش ہے ،ایہو طبقہ کجھ مہینے پہلے جوڈیشل ایکٹیویزم تے تنقید کریندا ہا،اساں سمجھدوں جو آئین اتے قنون مطابق اپنڑاں کردار ادا کریندے پئے ہسے ۔انہاں واضح کیتا جو میں پہلے وی آکھیا ہا جو سوموٹو دا اختیار قومی اہمیت دے معاملے تے استعمال کیتا ویسی ،یعنی جڈاں اساں ضروری سمجھسوں سوموٹونوٹس گھن گھنسوں اتے کہیں دے مطالبے تے گھدا گیا نوٹس سوموٹو نوٹس نی ہوندا، فاضل چیف جسٹس زیرالتوا مقدمات دے حوالے نال آکھیا جوگزریل عدالتی سال دے شروع اچ سارے ملک دی عدالتاں اچ زیرالتوا مقدمیان دی تعداد 18لکھ توں ودھ ہائی،جیرھی جو ہنڑ گھٹ تھی تے ساڈھے17 لکھ توں ودھ رہ گی ہے ، گزریل سال سپریم کورٹ اچ 19 ہزار 751 نویں مقدمے درج تھئے،جڈاں جو گزریل سال 57 ہزار 684 مقدمے نبیڑے گئے ۔انہاں آکھیا جومقدمیاں کوں تکھے نبیڑن سانگے عدالت عظمٰی اچ ای کورٹ سسٹم متعارف کراڈتا گئے،انصاف دے شعبے اچ بی اہم اصلاحات وی کیتیاں گن ،لیکن یہ امرواضح ہے جو اساں بطور ادارہ ایجھے تاثر کوںخطرناک سمجھدوں جو ملک اچ جاری احتساب سیاسی انجنیئرنگ ہے،ایجھے تاثر کوں مکاونڑ سانگے اقدامات کیتے ونجنڑ۔ تقریب توں سپریم کورٹ بار ایسوسی ایشن دے صدرامان اللہ کنرانی اتے اٹارنی جنرل انورمنصور وی خطاب کیتا۔
