اسلام آباد ۔ 14 اکتوبر (اے پی پی) وفاقی کابینہ سی ڈی اے کوں ڈو سال اچ اسلام آباد دے ماسٹر پلان دی تیارکرنڑ دی ہدایت کیتی ہے، وزیر اعظم مصنوعی طور تے اشیائے ضروریہ دی قیمتاں اچ ناجائز ودھارا کرنڑ آلے عناصر دے خلاف کریک ڈاﺅن کرنڑ، متروکہ املاک دے نال نال اوقاف دی جائیداداں کوں سماجی مقاصد کیتے استعمال کرنڑ سانگے پلان بنڑاونڑدی ہدایت کر ڈتی ہے، وزیراعظم عمران خان منگل کو ں سعودی عرب دا دورہ کریسن ،ا یہ او آئی سی دے ملکاں کوں کٹھا کرنڑ دی کوشش ہے ۔ اطلاعات و نشریات سانگے معاون خصوصی ڈاکٹر فردوس عاشق اعوان سنوار کوں وزیراعظم عمران خان دی صدارت اچ تھیونڑ آلے کابینہ اجلاس دے بعد میڈیا کو ں بریفنگ ڈیندے ہوئیں ڈسائے جو وفاقی کابینہ کوں متروکہ وقف املاک بورڈ دی جائیداداں بارے تفصیلی بریفنگ ڈتی گی۔ وزیر اعظم آکھیے جو لینڈ بنک (میسر زمین) ملک دا سبھ توں وڈا اثاثہ ہے، ایجھی املاک کوں استعمال کر تے معیشت کو ں فائدہ پجایا ونج جا سگدے ۔ وفاقی کابینہ اقتصادی رابطہ کمیٹی دے 02اکتوبر 2019دے اجلاس اچ کیتے گئے فیصلاں دی توثیق کیتی۔ معیشت دے حوالے نال حکومتی اقدامات تے گالھ مہاڑ کریندے ہوئیں وزیراعظم کابینہ اراکین تے زور ڈتا جو ملکی حالات خاص کر معاشی حالات اتے معیشت دی چنگائی سانگے کیتے گئے فیصلاں اتے انہاں دے ثمرات بارے عوام کوں مسلسل ڈسایا ونجے۔ کابینہ کوں روزمرہ اشیائے ضروریہ دی قیمتاں بارے بریفنگ ڈتی گی ۔ وزیر اعظم کو ں جمعہ آلے ڈینھ روزمرہ استعمال اچ آونڑآلی شئیں دی قیمتاں بارے تفصیلی بریفنگ ڈتی ویسی ،جیندے اچ صوبیں دے نمائندے وی شریک تھیسن۔ کابینہ ولوں کابینہ کمیٹی قنون سازی دے 04 اکتوبر 2019 دے اجلاس اچ کیتے گئے فیصلاں دی وی توثیق کیتی۔ کابینہ کو ں ڈسایا گیا جو 89 دوائیاں دی قیمتاں اچ گھٹکی گھن آونڑ دی تجویز آندے کابینہ اجلاس اچ پیش کر ڈتی ویسی ۔ کابینہ دوائیاں بنڑانڑ اچ معیار کوں یقینی بناونڑآلے ادارے دے سربراہ دی تعیناتی سانگے 10سال دے تجربے دی شرط گھٹ کرتے چھی سال کرنڑ بارے تجویز تے ہدایت کیتی جو معاون خصوصی صحت اتے معاون خصوصی سماجی تحفظ ڈاکٹر ثانیہ نشتر ایں بارے پیش کیتی گی صلاح دا جائزہ گھنڑ ۔ کابینہ اسلام آباد ہیلتھ کیئر ریگولیشن ایکٹ 2018تحت بورڈ آف اتھارٹی دے ممبرلاونڑ دی منظوری ڈتی۔ وفاقی کابینہ رئیل اسٹیٹ (ریگولیشن اینڈ ڈویلپمنٹ) آرڈنینس 2019 تحت ریئل اسٹیٹ ریگولیٹری اتھارٹی بنڑاونڑ دی اصولی منظوری ڈتی۔ شباہت علی شاہ کابینہ کوں ڈسایا جو گورنمنٹ آف پاکستان سانگے واٹس ایپ سرور متعارف کرایا ویسی۔کابینہ دے فیصلاں تے عمل درآمد کوں یقینی بناونڑ سانگے منظم فیصلاں دے نظام دی اپیلیکیشن بنڑاونڑ بارے وی کابینہ کوں ڈسایا گیا ۔
