تہران۔ 13 اکتوبر (اے پی پی)وزیراعظم عمران خان آکھیے جو پاکستان دے سعودی عرب اتے ایران نال چنگے، بھراواںا آلے تاریخی تعلقات ہیں،پاکستان مسلے دی گویڑ جانڑدے ہوئے ایران اتے سعودی عرب دا کوئی جھیڑا نئیں چاہندا،مذاکرات نال اختلافات مکاونڑ کیتے سہولت کار بنڑن کوں تیار ہیں،ایران اتے سعودی عرب دے جھیڑے نال خطے دی امن و سلامتی ہی نئین معیشت کوں وی نقصان پجسی،ڈوہیں بھرا اسلامی ملک صبر اتے برداشت ڈکھاون۔ اے گالھ انہان تہران اچ ایران دے صدر حسن روحانی نال ملنڑ توں بعد کٹھے پریس کانفرنس کریندے آکھی۔انہاںا ٓکھیے جو پاکستان چاہندے جو خطے اچ کوئی وی جھیڑا نہ تھیوے،تہوں ایران آیاں تاں جو ڈو اسلامی بھرا ملکاں وچال صلح کیتے مذاکرات کراواں اتے سہولت کار دا کردار ادا کروں، ایران سعودی جھڑیے دے خطے تے گندے اثرات پوسن،ایندے نال خطے دے نال نال ترقی پذیر ملکاں کوں وی اگو تے ودھنڑ اچ اوکھ تھیسی۔وزیراعظم ا ٓکھیے جو ایرانی صدر نال چنگی گالھ مہار تھئی اے، ڈوطرفہ تجارت وتعلقات، دہشتگردی دے خلاف اقدامات،ایران تے پابندیاں اتے ایٹمی پروگرام معاہدے سودھے ایران سعودی جھیڑا مکاونڑتے الوائے،اج دی گالھ مہاڑ توں بعدمنگل کوں سعودی عرب ہک چنگاں سنیہاگھن تے نویںسوچ نال ویساں،امریکی صدر ایران سعودی عرب جھیڑا مکاونڑ دا آکھیا ہا بھل اساں اپنڑی مرضی نال اے قدم چیندے پئے ہیں جو اے ہک وڈا مسلہ اے، کوشش اے جو امریکا ایران جھیڑا مکاونڑ اچ وی ہتھ ونڈاوں۔وزیراعظم مقبوضہ کشمیر دے عوام دی حمایت تے ایرانی حکومت دا شکریہ ادا کیتا۔ ایرانی صدر حسن روحانی آکھیے جو ایران اتے پاکستان ڈوہیں کوں خطے دی صورتحال تے چنتا اے،خطے اچ استحکام کیتے رل مل تے کوشش کریسوں،پاکستانی اتے ایرانی قیادت دیاں ملاقاتاں خطے اچ صورتحال بدلنڑ کیتے اہم ہین۔