ملتان ۔19 اکتوبر(اے پی پی)وزیرخارجہ مخدوم شاہ محمودقریشی آکھیے جو بھارت ایف اے ٹی ایف اچ پاکستان کوں بلیک لسٹ کراونڑ اچ ناکام تھی گئے، پاکستان کوں فروری 2020ءتئین مہلت مل گئی اے، امید اے جو اساں او تئیں ایف اے ٹی ایف دے سارے اہداف پورے کر تے گرے لسٹ اچوں نکل ویسوں۔اے گالھ انہاں ملتان اچ میڈیا نال گالھ مہاڑ کریندے آکھی۔ انہاں آکھیا جو ایف اے ٹی ایف بارے قوم کوں مبارک ڈینداںاتے مودی کوں آہداں”ڈک سگدیں تاںڈک گھن“وزیراعظم 9 نومبرکو ں کرتار پور راہداری دا افتتاح کریسن۔انہاں آکھیے جو بھارت ایں ویلھے بہوں دباو دا شکار اے،جگ اوندا بیانیہ رد کرڈتے،سول سوسائٹی اتے میڈیاکشمیر تے بھارت دا کور جانڑ چکین اتے بھارت چاہندے جو کشمیر توں جگ دی توجہ ہٹائی ونجے۔انہاں آکھیے جو اپوزیشن عقل ہتھ مارے اتے اینجھا کوئی کم نہ کرے جیندے نال بھارتی موقف سچا تھیوے، 27 اکتوبر کوں یوم سیاہ دے موقع تے اپوزیشن دی مارچ دی کال پاروں بھارت اچ مٹھائیاں ونڈینداں پین،بھارت دے وس اچ کائنی جو او راہداری نہ کھولے،جیویں سکھ یاتری تیاریان کریندے پین او جذبہ ڈیکھنڑ آلا اے،پاکستان سابق بھارتی وزیراعظم منموہن سنگھ کوں وی افتتاحی تقریب اچ سڈیے، انہاں خط بھیجے جو او مہمان خصوصی دی نئیں صرف عام شہری آلی کارآسن، اساں انہاں دا خیر مقدم کریسوں۔شاہ محمود قریشی آکھیا جو ملکی معیشت تکڑی تھیندی پئی اے،آندا مرحلہ ترقی دی رفتار ودھاونڑ دا اے،ول سرمایہ کاری اتے روزگار تے توجہ ڈتی ویسی تاں جو مہانگ کوں ہتھیکے کر تے عام لوکاں کوں سوکھ ڈتا ونجے۔
