اسلام آباد ۔ 9 اکتوبر (اے پی پی) صحت دے شعبہ اچ معاونتی ٹیکنالوجی تئیں رسائی اچ چنگائی پاروں وزارت قومی صحت سروسز اتے چین دی ڈس ایبلڈ پیپلز فیڈریشن وچال مفاہمت دی یادداشت تے دستخط تھئے ہن۔ دستخطاں دی تقریب اچ پاکستان اتے چینی وزیر اعظم وی موجود ہن۔ ایہ تاریخی اہمیت رکھنڑ آلی مفاہمتی یادداشت ہے اتے ایندے نال نہ صرف پاکستان اتے چین اچ معذوراں کو ں فائدہ پجسی بلکہ بیلٹ اینڈ روڈ اینیشی ایٹو نال منسلک سارے ملک وی ایں توں فائدے چیسن ۔ ایہ گالھ وزیراعظم دے معاون خصوصی صحت ڈاکٹر ظفر مرزا بیجنگ دے گریٹ ہال اچ دستخطاں دی تقریب اچ ڈسائی جنہاں پاکستان ولوں یادداشت تے دستخط کیتے ۔مفاہمت دی ایہ یادداشت انہاں 3یادداشتاں وچوں ہک ہے جنہاں تے وزیراعظم عمران خان دے دورہ چین اچ دستخط تھئے۔ مفاہمتی یادداشت توں پاکستانی معذور لوک فائدے چیسن اتے صنعتی تعاون نال ایں شعبہ دی پاکستانی صنعت وی اگی تے ودھسی ۔
