اسلام آباد ۔ 11 نومبر (اے پی پی) وفاقی وزیر انسانی حقوق ڈاکٹر شیریں مزاری آکھیے جواقوام متحدہ مقبوضہ کشمیر اچ بھارتی ظلم دا نوٹس گھنے ، 5 اگست دے بعد توں ہنڑ تئیں قابض فوج 144 گھٹ عمر دے بالاںکوں حراست اچ گھن چکی اے ۔اقوام متحدہ دی سلامتی کونسل دی ذمے واری اے جو او مقبوضہ کشمیر اچ کشمریاں دے قتل تے تشدد دے واقعات کوں سامنڑے رکھیندے ہوئیں مداخلت کرے ۔سنوار کوں اے پی پی نال گال مہاڑ کریندے ہوئیں ڈاکٹر شیریں مزاری آکھیا جو مقبوضہ کشمیرا چ 5اگست دے بعد توں ہنڑ تئیں قابض فوج تے پولیس 9سال دے بال سمیت 144گھٹ عمر دے بالاں کوں حراست اچ گھدے ،بھارتی حکومت کشمیر دی متنازع حیثیت کوں ختم کرڈتے اتے مسلسل کرفیو لا رکھیے جیں متعلق عدالت ولوں مقررہ کیتی گئی کمیٹی وی اپنڑی رپورٹ اچ انہاں واقعات دی تصدیق کیتی اے ۔ انہاں آکھیے جو مقبوضہ کشمیر اچ ہزاراں تے تشدد کیتا ویندا پئے ،انسانی حقوق دی سرگرم کشمیری تنظیماں دے کارکناں دے مطابق 5اگست دے بعد توں 13ہزار گھٹ عمر دے بالاں کوں حراست اچ گھدے تے انہاں تے تشدد کیتا ویندا پئے ۔ ڈاکٹر شیریں مزاری آکھیا جو بہوں سارے قانونی جواز موجود ہن جیرھے جو کشمیر متعلق پاکستان دے موقف دی نہ صرف حمایت کریندن بلکہ بھارتی بیانیے دی نفی وی کریندن ۔
