اسلام آباد ۔ 20 نومبر (اے پی پی) وزیر خارجہ شاہ محمود قریشی آکھیے جو حکومت پاک چین اقتصادی راہداری دے منصوبیاں کوں ویلھے تے مکمل کرنڑچاہندی اے،بیلٹ اینڈ روڈ منصوبہ چھی سال اچ اقتصادی تعاون و عالمگیریت دی مثال دے طور تے ابھریے، توانائی اتے انفراسٹرکچر منصوبیاں دی تکمیل ساڈی معیشت کیتے فیدہ ڈیسی۔اے گالھ انہاں بیلٹ اینڈ روڈ بارے بین الاقوامی کانفرنس نال خطاب اچ آکھی۔انہاں آکھیا جو بدلدے عالمی اقتصادی حالات اچ اینجھے منصوبیاں دی اہمیت ودھ گئی اے،وزارت خارجہ کلہیں گھمبیر چیلنجز نال نئیں نمٹ سگدی،ایندے کیتے ماہرین اتے تھنک ٹینکس نال صلاح دی لوڑھ پوندی اے۔ انہاں فارن سروس اکیڈمی کیتے نویں عمارت دی پیشکش تے چینی سفیر دا شکریہ اداکیتے۔وزیر خارجہ آکھیے جو بیلٹ اینڈ روڈ منصوبہ بہوں اہم اے،اے منصوبہ ایشیا، یورپ اتے افریقہ دے خطیاں اچ 4 ارب لوکاں کوں مشترکہ ترقی دے فیدے ڈیسی جیندے نال نا صرف ٹرانسپورٹ منصوبیاں اچ فیدہ تھیسی بھل سفری ویلھے اچ 12 فیصد کمی ، تجارتی حجم اچ 2.7توں 9.7 فیصد ودھارا ، انکم دی شرح3.4 فیصد ودھاونڑ اتے لکھاں لوکاں کوں غربت اچوں کڈھنڑ دا موقع ملسی۔انہاں آکھیے جو خطے اچ وڈے چیلنجزچین امریکہ اقتصادی مسابقت،ایران امریکہ کشیدگی ،افغانستان دی صورتحال اتے جنوبی ایشیا اچ بھارت دی ہندوتوا سوچ شامل اے جیندے نال نبڑن کیتے مشترکہ حکمت عملی دی لوڑھ اے۔انہاں آکھیے جو سی پیک، بیلٹ اینڈ روڈ منصوبہ ساڈی صنعت سازی، اقتصادی ترقی، تجارت و سرمایہ کاری کیتے اہم اے ،این سانگے سی پیک اتھارٹی دا قیام، 9 اقتصادی زونز بیرونی سرمایہ کاری گھن آونڑ اچ مدد ڈیسن۔
