مقبوضہ کشمیر اچ مظلوم کشمیری گزریل 100 ڈینھ توں بھارتی جبر دی چکی اچ پہیندے پن ،وزیر خارجہ شاہ محمود قریشی

اسلام آباد ۔ 12 نومبر (اے پی پی) وزیر خارجہ شاہ محمود قریشی آکھیے جو مقبوضہ کشمیر اچ مظلوم کشمیری گزریل 100ڈینھ توں بھارتی جبر و استبداد دی چکی اچ پہیندے پن، مظلوم کشمیریاں کوں بھارتی ظلم توں نجات ڈیواونڑ کیتے عالمی برادری تے انسانی حقوق دیاں علمبردار بین الاقوامی تنظیماں کوں اگی تے ودھ تے موثر اقدامات کرنڑیں ہوسن ۔ منگل کوں مقبوضہ جموں و کشمیر دے حوالے نال وزیر خارجہ ہک خصوصی پیغام اچ آکھیے جو اج مقبوضہ جموں تے کشمیراچ بھارت ولوں جاری مسلسل کرفیو کوں سو ڈینھ گزر چکن ،مودی سرکار گزریل سو ڈینھ توں 80لکھ نہتے کمشیریاں کوں محصور کر رکھیے ۔انہاں آکھیے جو نشوم بالاں تے تریمتاں تے تشدد کیتا ویندا پئے ،مسلسل کرفیو پاروں خوراک تے دوائیں تئیں رسائی حاصل نہ تھیونڑ پاروں ہر پاسے موت دے پچھاویں آئے کھڑن۔ شاہ محمود قریشی آکھیے جو ہک پاسے پاکستان محبتاں دی راہداریاں کھولیندا پئے تاں ڈوجھے پاسے جمہوریت تے رواداری دی کوڑی دعویدار، بھارتی سرکار ولوں مقبوضہ جموں و کشمیر اچ نماز جمعہ اتے نماز عید دی ادائیگی تے پابندیاں لاتیاں ویندیاں پن ، مسیتاں کوں تالے لاڈتے گن محرم الحرام اتے عید میلاد النبی دے جلوس تئیں نی کڈھنڑ ڈتے گے ۔ وزیر خارجہ آکھیے جو مقبوضہ جموں و کشمیر اچ گزریل سو ڈینھ توں بھکے پیاسے قید اچ نہتے کشمیریاں دے عزم تے ہمت کوں سلام پیش کرینداں تے انہاں کوں یقین ڈوینداں جو جڈاں تئیں اقوام متحدہ دیاں قرارداداں دے مطابق انہاں کوں حق خود ارادیت حاصل نی تھیندا ، پاکستان اپنڑے کشمیری بھراواں دی قانونی، اخلاقی اتے سفارتی معاونت جاری رکھیسی۔