پاکستان کوں عالمی ماحولیاتی فنڈ دی سربراہی مل گی اے، گرین کلائمیٹ فنڈ دی سربراہی ملنڑ ملک کیتے وڈا اعزاز اے ، مشیر ماحولیات ملک امین اسلم

اسلام آباد ۔ 15 نومبر (اے پی پی) وزیراعظم عمران خان دے مشیر ماحولیات ملک امین اسلم آکھیے جو پاکستان کوں عالمی ماحولیاتی فنڈ دی سربراہی مل گی اے، گرین کلائمیٹ فنڈ دی سربراہی ملنڑ ملک کیتے وڈا اعزاز اے ،پاکستان ماحولیات دے ساریں توں وڈے عالمی فنڈ کوں چیئر کریسی ،جیں نال پاکستان کوں فنڈز وی سوکھا ملسی ۔جمعے کوں جاری کیتے گے ہک ویڈیو پیغام اچ ملک امین اسلم آکھیے جو پاکستان اقوام متحدہ دے زیر انتظام عالمی ماحولیاتی فنڈ دے 12رکنی بورڈ دا سربراہ ہوسی، پاکستان دے نعمان بھٹی ایندے چیئرمین منتخب تھی گن۔ مشیر ماحولیات آکھیے جو گرین کلائمیٹ فنڈ دی سربراہی پاکستان کوں ملنڑ اعزاز دی گال اے ،انہاں آکھیے جو عالمی ملک 100ارب ڈالر دا فنڈ مختص کریسن ، پاکستان ہنڑ تئیں 140ملین ڈالرزدا فنڈزگھن چکے، انہاں آکھیے جو مزید فنڈز نال پاکستان ڈاہ ارب درخت لاونڑ کیتے وی معاونت حاصل کریسی ۔