کرتارپور ۔ 09 نومبر (اے پی پی) وزیر اعظم عمران خان بھارت کوں ہک واری ول مسلہ کشمیر دے حل دی پیشکش کریندے آکھیے جو کشمیر ہک زمین دے ٹوٹے دا نئیںپوری انسانیت دا مسلہ اے، پاکستان اتے بھارت دا وڈا مسلہ کشمیر اے،جیکرمسلہ کشمیر حل تھی گیاتاںڈوہیں ملک ہی نئیں پورا برصغیر ترقی دی راہ تے ٹر پوسی،امن نال کروڑاں لوکاں دا بھلاتھیسی،کرتار پورکھلنڑتے خوشی اے۔اے گالھ وزیر اعظم عمران خان نارووال اچ کرتا پور راہداری دا باضابطہ افتتاح کرنڑ دے بعد تقریب نال خطاب اچ آکھی۔انہاں بہوں گھٹ ویلھے اچ کرتار پور راہداری منصوبہ مکمل کرنڑ تے ایف ڈبلیو او سودھے بئے متعلقہ اداریاں کوں مبارکباد ڈتی اتے سکھاں کوں بابا گوروناک دیو جی دے 550ویں جمنڑ ڈینہہ دیاں تقریبات پاکستان آتے مناونڑ تے وی مبارک ڈتی اتے خوش آمدید آکھیا۔وزیراعظم عمران خان آکھیا جو حکومت سنبھلیندے ہی بھارتی وزیر اعظم نریندر مودی کوں مسلہ کشمیر دے حل دا آکھیا ہا اتے انہاں کوں ڈسایا ہا جو اے مسلہ امن اتے ترقی دی راہ اے جیکر حل تھی گیا تاں ایندے نال انسانیت دی وی خدمت تھیسی اتے پورا بر صغیرخوشحالی دے رستے تے ٹر پوسی،اساں بھارت کوں مذاکرات دی دعوت ڈتی اے بھل بھارت دے انکار پاروں اج اے مسلہ علاقائی مسئلے توں وی اگو تے نکل گئے۔ انہاں آکھیے جو مقبوضہ کشمیر اچ انساناں نا زناوراںا ٓلا سلوک تھیندا پئے،ساڈے تعلقات ایں مسلے پاروں ڈکیج گین،مودی کوں سنیہا ڈینداں جو انصاف نال امن اتے ناانصافی نال فساد پھیلدے،بھارتی وزیر اعظم مسئلہ کشمیر حل کرتے برصغیر کوں بحراناں توں کڈھ تے ترقی تے سٹ سگدن،سوچو جیکر سرحدان کھل ونجن، تجارت شروع تھیوے ،اقٹسادی سرگرمیان ہوون تاں کتنی ترقی تھیسی،جڈاں کشمیریاں کوں حقوق مل گئے تاں خطے اچ وی خوشحالی آ ویسی۔ وزیراعظم آکھیا جو اللہ تعالی رب العالمین اتے ساڈے پیغمبر حضرت محمد رحمت للعالمین ہن جیں انسانیت، انصاف، بھرا بھرپی ، امن اتے پیار دا سنیہا ڈتے،بابا گرونانک دا فلسفہ وی انسانیت،انصاف اتے رواداری سکھیندے،اولیا کرام وی ایہو درس ڈتے۔ وزیراعظم آکھیے جو میکوں کرتار پور دی اہمیت دیر نال پتہ لگی اے جیویں مسلمان مدینہ چار کلومیٹرپریں ڈیہدا کھڑا ہووے بھل ونج نہ سگے۔ وزیراعظم آکھیے جو لیڈرنفرت دی بجائے لوکاں کوں کٹھا کرے، ساڈے رسول پاکوی محبت نال اپنڑا سنیہا پچائے۔
