ہندوستان، کرتارپور راہداری توں جگ دی توجہ ہٹاونڑ کیتے بابری مسیت کیس دافیصلہ خاص طور تے اج سنڑوائے، وزیر خارجہ مخدوم شاہ محمود قریشی

اسلام آباد ۔ 09 نومبر (اے پی پی)وزیر خارجہ مخدوم شاہ محمود قریشی ایودھیا کیس اچ بھارتی سپریم کورٹ دے فیصلے تے آکھیے جو ہندوستان، کرتارپور راہداری توں جگ دی توجہ ہٹاونڑ کیتے خاص طور تے کرتار پور راہداری دے افتتاح آلے ڈینہہ ایودھیا کیس دا فیصلہ سنڑاونڑکیتے اج دا ڈینہہ چنڑیے ،کیوں جو بھارتی حکومت پورے ملک کوں تعصب دی بھا اچ سٹنڑ چاہندی اے۔اپنڑے رد عمل اچ وزیر خارجہ آکھیا جو مقبوضہ کشمیر بارے مقدمیاں کوں تاں بھارتی سپریم کورٹ اچ کوئی اہمیت نئیں ملدی پئی بھل بھارتی سپریم کورٹ بے حسی ڈکھیندے ہوئے نہ صرف انصاف دا قتل کیتے بھل ہک نویں بحث کھنڈا ڈتی اے اتے بھارتی مسلماناں کوں عدم تحفظ دا شکار کرڈتے، پاکستان محبتاں دی راہداری شروع کیتی اے بھل مودی سرکاردی سیاست نفرتاں دی سیاست اے، اے فیصلہ بھارتی حکومت ولوں بابری مسیت دی جاہ تے رام مندربنڑاونڑاتے ہندواتوا منشور تے عمل داثبوت اے،ساکوں افسوس اے جو مودی سرکار اج سکھاں دی خوشیاں دے رنگ اچ بھنگ پاونڑ دی کوشش کیتی اے اے، بھارتی سپریم کورٹ دا فیصلہ ہندوستان دی تنگ نظری دا ثبوت اے، اج گاندھی دا ہندوستان دفنیج گئے اتے بھارت مودی اتے آر ایس ایس دا ہندوستان بنڑ گئے۔