اسلام آباد ۔ 16 نومبر (اے پی پی) الیکشن کمیشن آف پاکستان آکھیے جو 11کروڑ 30 لکھ توں ودھ ووٹراں دیاں ابتدائی انتخابی فہرستاں دسمبر 2019 اچ شائع تھیسن جیندے کیتے ووٹرز اپنڑا اتے اہلخانہ دے ووٹ دا درست اندراج یقینی بنڑاون،بلدیاتی انتخابات کیتے انتخابی فہرستاں دی ابتدائی اشاعت دسمبر 2019 دے پہلے عشرہ اچ کیتی ویسی۔ کمیشن ولوں ڈسایا گئے جو غیر حتمی / ابتدائی انتخابی فہرستاں دی چھپائی شروع تھی گئی اے جیہڑیاں مرحلہ وارسارے ضلعیاں کوں دتیاں ویسن۔ اے فہرستاں ہر ضلع اچ ڈسپلے سنٹرز،معائنہ مراکز اچ رکھیاں ویسن تاں جو ووٹرز فہرستاں کوں ڈیکھ تے درستگی کرا سگن۔ ڈسپلے سینٹرز تے فارم 15 برائے اندراج و منتقلی ووٹ، فارم 16 برائے اخراج / اعتراض اتے فارم 17 برائے درستگی کوائف جمع کرواونڑ دی سہولت ہوسی۔
