امریکی صدر ڈونلڈ ٹرمپ دے خلاف ایوان نمائندگان اچ مواخذے دیاں 2 قرارداداں منظور

واشنگٹن ۔ 19 دسمبر (اے پی پی) امریکی صدر ڈونلڈ ٹرمپ دے خلاف مواخذے دیاں 2 قرارداداں ایوان نمائندگان اچ منظور کر گھدیاں گن جیں دے بعد ٹرمپ مواخذے دا سامنا کرنڑآلے امریکہ دے تریجھے صدر بنڑ گن ۔ ذرائع دے مطابق امریکی صدرتے الزام اے جو انھاں یوکرین تے ذاتی سیاسی مفادات حاصل کرنڑ کیتے دباﺅ پاتے تے کانگریس دی تحقیقات اچ رکاوٹ پاونڑ دی کوشش کیتی ۔ایوان نمائندگان اچ مواخذے دے حق اچ 229 جڈاں جو مخالفت اچ198 ووٹ پاتے گن ،صدر ٹرمپ تے ہنڑ امریکی پارلیمان دے ایوان بالا( سینیٹ) اچ مقدمہ چلایا ویسی ۔صدر دی برطرفی کیتے سینیٹ دی ڈو تھائی اکثریت کوں ایندے خلاف ووٹ ڈیونڑاں پوسی ۔ ٹرمپ دی حکمران ریپبلکن پارٹی کوں100ارکان تے مشتمل سینیٹ اچ 53 نشستاں حاصل ہن تے حزب اختلاف دی جماعت ڈیموکریٹ پارٹی کوں صدر دے خلاف مواخذے دی تحریک کوں کامیاب بنڑاونڑ کیتے 67 ووٹاں دی ضرورت ہو سی۔صدر ٹرمپ ایوان نمائندگان توں مواخذے دی منظوری تے ردعمل ڈیندے ہوئیں آکھیے جو ڈیموکریٹ پارٹی نفرت تے کاوڑ نال بھری ہوئی اے تے عوام دے ووٹاں کوں مسترد کرنڑ دی کوشش کریندی پئی اے ۔