اسلام آباد ۔ 4 دسمبر (اے پی پی) صدر مملکت ڈاکٹر عارف علوی پیمرا کوں ہدایت کیتی اے جو جنسی زیادتی دے شکار بالاں دے انٹر ویو ڈکھالنڑ آلے پروگراماں دے حوالے نال متعقلہ قوانین تے عمل درآمد کوں یقینی بنڑاوے ۔ بدھ کوں ہک ٹویٹ اچ صدر مملکت آکھیا جو ہک ٹی وی چینل دے اینکر لوکاں دے سامنڑے جنسی زیادتی دے شکار بالاں دے انٹرویو کیتن تے انہاں کوں ٹیلی کاسٹ کیتا گے تے ایں چیز دا خیال وی نی رکھیا گیا جو ایندے نفسیاتی تے سماجی اثرات کیا ہوسن ،انہاں پھل جیہے بالاں دا مذاق اڈایا ویسی ۔صدر مملکت آکھیا جو ایں معاملے اچ انہاں چیئرمین پیمرا کوں وی ڈسائے لیکن ایندے باوجود اے پروگرام ولا ٹیلی کاسٹ تھی گے ۔ صدر مملکت آکھیا جو ایں طرح دے پروگرام دے حوالے نال قانون ہوسن لیکن ایندے تے عمل درآمد کیوں نی کیتا گیا ۔انہاں آکھیے جو دنیا اچ کتھائیں وی اینویں کائنی تھیندا ، اے بہوں افسوسناک اے ۔
