اسلام آباد ۔09 دسمبر(اے پی پی) سری لنکن ٹیم پاکستان دے خلاف ڈو ٹیسٹ میچاں دی سیریز کھیڈنڑ کیتے پاکستان پج گئی اے ۔ سری لنکن ٹیم پرواز ای کے 612 دے ذریعے دبئی توں اسلام آباد پجی تاں اسلام آباد ایئرپورٹ تے سیکیورٹی دے سخت انتظامات کیتے گے ہن ۔ پاکستان کرکٹ بورڈ دے حکام مہمان ٹیم دا استقبال کیتا۔ پاکستان اتے سری لنکا وچال پہلا ٹیسٹ میچ (کل) بدھ توں راولپنڈی کرکٹ سٹیڈیم اچ شروع تھیسی جیرھا جو15 دسمبر تئیں جاری رہسی ۔ سری لنکن ٹیم دے کھلاڑی منگل کوں پریکٹس میچ کھیڈسن ۔ پریکٹس میچ دے بعد ڈوہیں ٹیماں دے کپتاناں دی پریس کانفرنس تھیسی، راولپنڈی کرکٹ سٹیڈیم اچ سکیورٹی دے سخت انتظامات کیتے گے ہن۔ ڈوجھا ٹیسٹ میچ 19 توں 23 دسمبر تئیں نیشنل سٹیڈیم کراچی اچ کھیڈیا ویسی ۔
