لاہور۔31 دسمبر(اے پی پی )لاہور ہائیکورٹ دے نامزد چیف جسٹس مامون رشید شیخ صبحائیں بدھ کوں اپنڑے عہدے دا حلف چیسن ،حلف برداری دی تقریب گورنر ہاوس لاہور اچ تھیسی۔ جسٹس مامون رشید شیخ لاہور ہائی کورٹ دے 49ویں چیف جسٹس دی حیثیت نال عہدے دا حلف چیسن ، گورنر پنجاب چودھری محمد سرور انہاں توں حلف گھنسن ،جسٹس مامون رشید شیخ 19 مارچ 1958ءکوں لاہور اچ جمیے ، گورنمنٹ کالج لاہور توں گریجویشن اتے پنجاب یونیورسٹی لاءکالج توں وکالت دی ڈگری حاصل کیتی، بطور وکیل سول، کمرشل، کارپوریٹ اتے آئینی مقدمیں دی پریکٹس کیتی تے بئے سرکاری اداریں دے قانونی مشیر وی رہیے ، جسٹس مامون رشید شیخ ایڈیشنل ایڈووکیٹ جنرل دے عہدے تے وی فائز رہیے، انہاں 19 فروری 2010ءکوں بطور ایڈیشنل جج لاہور ہائی کورٹ حلف گھدا تے 2 سال بعد لاہور ہائی کورٹ دے مستقل جج بنڑیے، جسٹس مامون رشید شیخ آئینی، فوجداری، کمرشل، سول اتے کارپوریٹ مقدمیں سمیت مختلف اہم نوعیت دے مقدمیں سنڑیے ، فاضل جسٹس 2013ءاتے 2018ءدے عام انتخابات دے سلسلے اچ بطور ٹریبونل فرائض وی سرانجام ڈتے ، فاضل جسٹس مختلف قومی تے بین الاقوامی یونیورسٹیاں اچ لیکچر ڈتے تے مختلف مقامی تے عالمی جوڈیشل کانفرنساں نال خطاب وی کیتا ۔
