وزیر خارجہ مخدوم شاہ محمود قریشی دی وفد دے رلے سری لنکا دے نویں منتخب صدر گو ٹابایا راجا پاکسے نال ملاقات

کولمبو۔ 2 دسمبر (اے پی پی) وزیر خارجہ مخدوم شاہ محمود قریشی وفد دے رلے سری لنکا دے نویں منتخب صدر گو ٹابایا راجا پاکسے نال ملاقات کیتی ، ملاقات اچ ڈو پاسے تعلقات ،خطے دی صورت حال سمیت سانجھے دلچسپی دے امور تے گال مہاڑ کیتی گی ۔ ڈی جی جنوبی ایشیا و ترجمان وزارت خارجہ ڈاکٹر محمد فیصل، سری لنکا اچ پاکستانی ہائی کمیشن دے سینئر حکام وی ایں موقع تے موجود ہن ۔ وزیر خارجہ صدر گو ٹابایا راجا پاکسے کوں پاکستان دی قیادت اتے عوام ولوں سری لنکا دے ستویں صدر منتخب تھیونڑ تے مبارخ ڈتی ۔ وزیر خارجہ سری لنکا دے صدرکوں صدر پاکستان ڈاکٹرعارف علوی ولوں تہنیتی خط وی ڈتا، جیں اچ صدر سری لنکا کوں مبارخ باد دے نال نال دورہ پاکستان دی دعوت ڈتی گی اے ۔مخدوم شاہ محمود قریشی آکھیا جو اساں کیتے خوشی دی گال اے جو 70 دی دہائی اچ پاکستان توں عسکری تربیت حاصل کرنڑ آلی شخصیت، اج سری لنکا دی صدارت سنبھال گھدی اے ،انہاں آکھیا اساکوں یقین اے جو تساڈے منصب سنبھالنڑ دے بعد پاکستان تے سری لنکا وچال برادرانہ تعلقات مزید مستحکم تھیسن ۔ وزیر خارجہ آکھیا جو سری لنکا دے عوام جیویں دہشت گردی دا ڈٹ تے مقابلہ کیتے او قابل تحسین اے ،انہاں آکھیے جو خشک سالی، سیلاب یا کہیں وی قدرتی آفت دا سامنڑاں ہووے تاں پاکستان دے عوام اپنڑے سری لنکا دے بھراویں دے رلے کھڑن ۔وزیر خارجہ سری لنکن صدر کوں پاکستان ولوں شروع کیتی گی معاشی سفارتکاری بارے ڈسیندے ہوئیں آکھیا جو پاکستان تے سری لنکا وچال سانجھی تجارت تے سرمایہ کاری دے بہوں سارے موقع موجود ہن جیں توں فائدہ چا ونڑ ڈوہیں ملکاں کیتے سود مند ثابت تھیسی۔سری لنکا دے صدر گو ٹابایا راجا پاکسے وزیر خارجہ مخدوم شاہ محمود قریشی کوں سری لنکا آمد تے خوش آمدید اکھیندے ہوئیں ، تہنیتی پیغامات اتے دورہ پاکستان دی دعوت تےصدر پاکستان اتے پاکستان دی اعلیٰ قیادت دا خصوصی شکریہ ادا کیتا۔