اسلام آباد ۔ 18 دسمبر (اے پی پی) پاکستان اتے سری لنکا دیاں کرکٹ ٹیماں وچال ڈو ٹیسٹ میچاں تے مشتمل سیریز دا ڈوجھا تے چھیکڑی ٹیسٹ میچ اج خمیس توں نیشنل کرکٹ سٹیڈیم کراچی اچ شروع تھیسی۔ میچ توں پہلے ڈوہیں ٹیماں کراچی اچ پریکٹس کیتی ،ڈوہیں ٹیماں وچال ایندے توں پہلے فروری 2009ءاچ کراچی اچ میچ کھیڈیا گیا ہئی جیرھا جو ہر جت دے فیصلے دے بغیر مک گیا ہئی ، پاکستان دی ٹیم کراچی اچ 41 ٹیسٹ میچ کھیڈ چکی اے جیں اچوں 21میچ جت گئی ہئی ۔ ڈوجھے ٹیسٹ میچ اچ کامیابی کیتے ڈوہیں ٹیماں دے کپتان بیان ڈتن تے توقع کیتی ویندی پئی اے جو ڈو میچاں دی سیریز دا ڈوجھا تے چھیکڑی ٹیسٹ میچ سخت تے کانٹے دار ہوسی شائقین کرکٹ کوں چنگی کرکٹ ڈیکھنڑ کوں ملیسی ۔سری لنکن ٹیم دیمتھ کرونارتنے دی قیادت اچ کراچی اچ موجود اے ، سری لنکن کھلاڑی پاکستان آمد تے بہوں خوش ہن تے اتھاں سیکورٹی دے انتظامات توں وی بالکل مطمئن ہن ۔ایندے توں پہلے ڈوہیں ٹیماں وچال ڈو ٹیسٹ میچاں دی سیریز دا پہلا میچ راولپنڈی اچ کھیڈیا گیا ہئی جیرھا جو مینھ پاروں تے خراب لائٹ دی نذر تھی گیا ہئی بغیر نتیجہ ختم تھی گیا ہئی ۔ پاکستان اتے سری لنکا دے درمیان سیریز ورلڈ ٹیسٹ چیمپئن شپ دا حصہ اے۔ نیشنل کرکٹ سٹیڈیم کراچی دے آسے پاسے سیکیورٹی دے فول پروف انتظامات کیتے گن۔ سری لنکن ٹیم دیمتھ کرونارتنے دی قیادت اچ میدان اچ لہسی جڈاں جو پاکستان ٹیم دی قیادت اظہر علی کریسن۔
