راولپنڈی ۔10 دسمبر (اے پی پی ) پاکستان اتے سری لنکا دیاں کرکٹ ٹیماں وچال ڈو ٹیسٹ میچاں تے مشتمل سیریز دا پہلا میچ صبحائیں بدھ توں راولپنڈی اچ شروع تھیسی ، پاکستان اچ 10سال بعد کرکٹ دی واپسی ،سری لنکن ٹیم دیمتھ کرونارتنے دی قیادت اچ پاکستان پج گئی اے ، ڈوہیں ٹٰماں دے کھلاڑیں پہلے میچ کیتے پنڈی سٹیڈیم اچ مشقاں کیتیاں ، پہلا میچ مینھ وسنڑ پاروں متاثر تھیونڑ دے امکان وی ہے۔ راولپنڈی کرکٹ سٹیڈیم اچ 15سال بعد ٹیسٹ کرکٹ دی واپسی تھئی اے ۔پاکستان اتے سری لنکا وچال سیریز ورلڈ ٹیسٹ چیمپئن شپ دا حصہ ہوسی، پاکستان دی ٹیم ڈے ٹیسٹ دی عالمی رینکنگ اچ اتے ونجنڑ دا سنہری موقع اے ، پاکستان اچ ہک ڈینھ دے میچ تے ٹی ٹوئنٹی میچاں تے مشتمل سیریز دے کامیاب انعقاد دے بعد سری لنکا ٹیم فیوچر ٹور پروگرام اچ شامل ٹیسٹ سیریز کھیڈنڑ کیتے پاکستان آگئی اے ، ڈوہیں ٹیماں وچال سیریز کیتے سیکورٹی دے بہترین انتظامات کیتے گن ۔ راولپنڈی کرکٹ سٹیڈیم دے آسے پاسے سیکیورٹی دے فول پروف انتظامات کیتے گن ، 42 سو دے نیڑے سیکیورٹی افسراتے ملازمین تعینات کرڈتے گن، سٹیڈیم دی سیکیورٹی پاک فوج سنبھال گھدی اے ۔واضھ رہے جو ڈو ٹیسٹ میچاں تے مشتمل سیریز دا ڈوجھا ٹیسٹ 19 توں 23 دسمبر تئیں نیشنل کرکٹ سٹیڈیم کراچی اچ کھیڈیا ویسی ۔
