واشنگٹن ۔ 11 دسمبر (اے پی پی) وائٹ ہاوس اعلان کیتے جو صدر ڈونلڈ ٹرمپ روسی وزیر خارجہ سرگئی لاروف نال ملاقات اچ روس کوں چتاونڑیں ڈتی اے جو آندے امریکی الیکشن اچ انہاں دی مداخلت خطرناک ہوسی ۔امریکی صدر ٹرمپ تے سرگئی لاروف وچال اوول آفس اچ منعقدہ اجلاس دے چھیکڑ تے جاری بیان اچ آکھیے جو امریکی انتخابات اچ روس دی مداخلت دی کہیں وی کوشش دے خلاف سخت کاروائی کیتی ویسی ۔ انہاں روس تے زور ڈتے جو او یوکرین دا جھیڑا پر امن طریقے نال حل کرے ۔ڈوجھے پاسے روسی وزیر خارجہ سرگئی لاروف آکھیے جو امریکی صدر دے نال بند کمرہ اجلاس اچ امریکی الیکشن اچ روسی مداخلت متعلق کہیں وی معاملے تے گال کائنی کیتی گی ۔ سرگئی لاروف ٹرمپ نال ملاقات دے بعد واشنگٹن اچ پریس کانفرنس کریندے ہوئیں آکھیے جو حقیقت اچ اساں الیکشن بارے گال کائنی کیتی ۔ واضح رہے جو گزریل منگل کوں امریکی وزیر خارجہ مائیک پومپیو اپنڑے روسی ہم منصب ، سرگئی لاروف کوں 2020 اچ تھیونڑ آلے امریکی صدارتی انتخابات اچ مداخلت دی چتاونڑیں ڈتی ہئی ۔
