اسلام آباد ۔ 4 دسمبر (اے پی پی) سلطان العاشقین حضرت خواجہ غلام فرید دے 122 ویں عرس مبارک دیاں ترائے ڈینھ دی تقریبات ضلع راجن پور دی تاریخی وستی کوٹ مٹھن اچ جاری ہن۔ ایں سانگے شہر کوں وڈے وڈے خیر مقدمی بینراں، پوسٹراں تے سوہنڑیں پینافلیکس نال سجایا گے ۔ ترائے ڈیہاڑی عرس اچ وڈی تعداد اچ پورے ملک توں قافلے پجدے پن ، زائرین دی ودھدی تعداد پاروں خواجہ فرید فانڈیشن دی طرفوں لنگر دے خصوصی انتظامات کیتے گن ۔ حضرت خواجہ غلام فرید دا سالانہ عرس مبارک جیرھا جو ایں جاہ دی بہوں وڈی ثقافتی تے معاشی سرگرمی وی ہوندے، ایں موقع تے شہر تے دربار دے چارے پاسے بازار سج گن جتھاں نینگر ، بالاں تے تریمتاں دی دلچسپی دیاں چیزاں دے سٹال توجہ دا مرکز بنڑ گن ۔ مٹھائی، چاہ دے ہوٹلاں تے وی پرے توں آونڑ آلے عقیدت منداں دا بہوں رش اے ۔ یاد رہوے جو اجوکے سال حضرت خواجہ غلام فرید دے عرس تے ضلعی حکومت دی گنتری دے مطابق 10لکھ توں ودھ لوکاں دی شرکت متوقع ہے۔ سالانہ عرس مبارک اچ پورے ملک توں وڈیاں درباراں دے سجاد گان عظائم مشائخ علماءکرام، دانشور ،محقق ، علی ادبی تے سیاسی سماجی رہنماواں سودھے لکھاں مریدین عقیدت مند آندے پن ۔عرس دے ڈوجھے ڈینھ تقریبات نماز فجر دے بعد قرآن خوانی توں شروع تھئے جیں اچ پورے ملک توں آئے ہوئے زائرین مزار تے قرآن خوانی کیتی۔ بعد اچ سویلے نو وجے سلسلہ عالیہ چشتیہ دی محفل سماع تھئی جیندے اچ مقامی قوالاں دے علاوہ بین الاقوامی شہرت یافتہ استاد شیر علی ،مہر علی سوہنڑیں آواز اچ کلام فرید سنڑا تے چس چوائی۔ پیشیں دی نماز دے بعد روایتی چادر پوشی دا جلوس دربار فرید گیا جیں دی اگوانڑیں ولی عہد راول معین کوریجہ کیتی جڈاں جو بئی معزز شخصیات اچ خواجہ شمس الدین کوریجہ ،خواجہ علی معین کوریجہ وی انہاں دے رلے ہن ۔ ایں توں علاوہ خواجہ فرید فاﺅنڈیشن دے عہدیداران اتے کارکنان وی وڈی تعداد اچ شریک تھئے ۔شرکا ءرسم چادر پوشی و تبدیلی دستار مبارک دی رسم ادا کیتی جڈاں جو ملک دی سلامتی اتے ترقی کیتے خصوصی دعائیں منگیاں گن ۔جلوس دے موقع دے سیکورٹی دے سخت انتظامات کیتے گے ہن جیں دے فرائض پولیس انجام ڈتن ۔
