سیالکوٹ26جنوری (اے پی پی )وزیر اعظم دی معاون خصوصی برائے اطلاعات و نشریات ڈاکٹر فردوس عاشق اعوان آکھیے جو 2020 قومی ترقی، خوشحالی اتے عوام کوں ودھ سوکھ دا سال ہوسی،حکومت ہر ریاستی ادارے توں بدعنوانی دیاں پاڑاں پٹنڑ کیتے اپنڑے اصلاحاتی ایجنڈے تے عملدرآمد جاری رکھیسی،وزیر اعظم عمران خان قوم دیان امیداں دے مطابق کم کرنڑ کیتے پر عزم ہین۔ اے گالھ انہاں سیالکوٹ اچ پریس کانفرنس کریندے آکھی جو وزیر اعظم عمران خان دی متحرک قیادت اچ تحریک انصاف حکومت دیاں مثبت اتے موثر معاشی پالیسیاں پاروں پاکستان ہنڑقومی معاشی استحکام دے مقصد دو کامیابی نال اگو تے ودھدا پئے،بدعنوان مافیا دے خلاف حکومت دی جنگ آخری مرحلے اچ اے اتے ملک اچ جمہوریت کوںمستحکم کرنڑ کیتے سارے اسٹیک ہولڈرز کوں حکومت دا ہتھ ونداونڑا چاہیدے۔انہاں آکھیا جو سارے ایم پی ایز پنجاب اچ وزیر اعلی سردار عثمان بزداردی قیادت تے پورا اعتماد کیتے،میڈیا اتے اپوزیشن اچ ’ٹرینڈ سیٹرز‘ اتے ’ایجنڈا سیٹرز‘کیتے یقینا اے چنگی خبر کائنی،حکومت دے اتحادی وی بالکل نال کھرن،ق لیگ ہووے، ایم کیو ایم یا بیا کوئی جماعت سارے پی ٹی آئی حکومت دا ہتھ ونڈیندے پین۔انہاں آکھیے جو حکومت کوں عوام پنج سال دا مینڈیت ڈتے جیڑھا او پورا کریسی تاں جو ملک ترقی داپندھ کرے،حکومت دے خلاف بولنڑ اتے لوکاں کوں گمراہ کرنڑ دی بجائے اپوزیشن پارلیمنٹ اچ اپنڑا آئینی کردار ادا کرے اتے قانون سازی اچ ہتھ ونڈاوے۔ڈاکٹر فردوس عاشق اعوان مظلوم کشمیریاں نال اظہار یکجہتی کریندے مقبوضہ جموں و کشمیر اچ جاری غیر انسانی سلوک دی مذمت کیتی اتے بے گناہ کشمیریاں دی نسل کشی تے جگ تے زور ڈتے جو او بھارت کوں غیر انسانی حرکتاں توں باز رکھے اتے دباو پاوے۔
