اسلام آباد ۔ 24 جنوری (اے پی پی)وزارت تجارت دے حکام سینیٹ دی قائمہ کمیٹی تجارت کوں ڈسائے جوملتانی سوہن حلوہ،پشاوری چپل اتے باسمتی چاول کوں جگ اچ متعارف کراونڑ دا قانون تیارکرگھدا گئے،خیبر پختونخواحکومت نسواراتے خٹک ڈانس کوں پاکستانی برانڈاچ رجسٹرڈ کرنڑدی درخواست کیتی اے۔قائمہ کمیٹی تجارت دے اجلاس اچ چیئرمین آئی پی او ڈسایا جو جغرافیائی قانون اچ اسی علاقائی و قومی سروسز اتے مصنوعات دی فہرست طے کیتی گئی اے جیندے اچ خیبرپختونخواحکومت خٹک ڈانس کوں رجسٹرڈ کرنڑ دی درخواست کیتی اے۔ ایندے تے سینیٹر شبلی فرازتجویز ڈتی جو قبائلی رقص ”اتنڑ“اتے نسوار کوں وی قومی برانڈ دی فہرست اچ رلایا ونجے۔شبلی فراز دی ایں صلاح تے کمیٹی ارکان زور نال کھل کھلا پین۔چیئرمین آئی پی او وضاحت کیتی جو جغرافیائی قانون دی کابینہ پہلے ہی ڈوہزار انوی کوں منظوری ڈے ڈتی ہئی ،ہنر جگ کوں پتہ لگ ویسی جو باسمتی چاول پاکستان دی پراڈکٹ اے،ایندے نال بھارت ساڈے باسمتی چاول کوں اپنڑے ناں توں نہ ویچ سگسی اتے اے چاول یورپ وی پاکستان دے چاول دے طور تے ویسی۔
