ملتان توں سرائیکی دا پہلا تحقیقی مجلہ”نگال“ فروری اچ سامنڑے آسی

ملتان ۔31 جنوری (اے پی پی)ملتان توں سرائیکی دا پہلا تحقیقی مجلہ فروری اچ سامنڑے آسی ۔بہاءالدین زکریایونیورسٹی شعبہ سرائیکی دے زیراہتمام ” نگال“ (کھوہ توں نکلنڑ آلا پانڑیں )دے ناں نال ڈو زباناں اچ چھپنڑ آلے ایں مجلے اچ ست سرائیکی تے ترائے انگریزی دے مضمون شامل ہن ۔اے تحقیقی جریدہ ہک سو توں ودھ ورقیں تے مشتمل اے ۔مجلس ادارت اچ سربراہ شعبہ سرائیکی ڈاکٹر ممتاز کلیانی ،ڈاکٹر خالد اقبال اتے محمد عارف شامل ہن۔رسالے دے مدیر ڈاکٹر خالد اقبال ” اے پی پی“ نال الویندے ہوئیں آکھیے جو ایں جریدے دی اشاعت ملتان اچ سرائیکی ادب تے تحقیق دے حوالے نال سنگ میل دی حیثیت رکھیندی اے ۔انہاں آکھیے اساں کیتے اعزاز دی گال اے جو پہلا تحقیقی جریدہ اساڈی ادارت اچ سامنڑے آندا پئے ،ایندے توں پہلے اسلامیہ یونیورسٹی بہاولپور دے شعبہ سرائیکی وی ڈاکٹر نصراللہ خان ناصر دے دور اچ سرائیکی تحقیقی مجلے دا اجرا کیتا ہئی لیکن ایندا صرف ہکو شمارہ ہی چھپ سگیا ۔انہاں آکھیے اساڈی کوشش اے جو ملتان توں سامنڑے آونڑ آلے ایں جریدے دی اشاعت تسلسل نال ٹردی رہوے ۔