اسلام آباد ۔ 14 جنوری (اے پی پی) وزیراعظم دی معاون خصوصی اطلاعات و نشریات ڈاکٹر فردوس عاشق اعوان آکھیے جو وزیراعظم عمران خان دی قیادت اچ ساریاں اتحادی جماعتاں ملکی ترقی تے خوشحالی دے قومی ایجنڈے تے متفق ہن ،اتحاد تے یک جہتی دے نال ہر محاذ تے پاکستان دے مفادات دا تحفظ کریسوں ،اتحادیاں کوں رلے گھن تے ٹرسوں ،قومی ترقی دا عمل انہاں کوں اعتماد اچ گھن تے انہاں دی مشاورت نال اگوں ودھیسوں ۔منگل کوں اپنڑے ٹویٹ اچ ڈاکٹر فردوس عاشق اعوان آکھیے جو نقطہ نظر دے اختلافات تے اپوزیشن اچ خوش تھیونڑ آلیں دیاں امیداں تے ہک واری ول اوس پوسی ،انہاں دیاں حسرتاں صرف حسرت ہی رہ ویسن انہاں آکھیے جو وزیراعظم عمران خان دی قیادت اچ ملک تے قوم دی خوشحالی دا عل مزید طاقت نال اگوں ودھسی ،ملک دے اندر تے باہر حکومتی اقدامات دے اثرات کامیابیاں دی صورت اچ سامنڑے آندے پن ۔ انہاں آکھیے جو وزیراعظم عمران خان دی ہدایت دی روشنی اچ وزیر خارجہ شاہ محمود قریشی دے ایران اتے سعودی عرب دے دورے بہوں چنگے اثرات دے حامل ہن۔ پاکستان چپ رہنڑ دی بجائے امت مسلمہ تے امن دے مفاد اچ تعمیری کردار ادا کیتے ۔
