”انگیج افریقہ معاشی سفارتکاری کانفرنس“ اچ شرکت کریسن ، مشیر تجارت عبدالرزاق داﺅدکانفرنس دی سربراہی کریسن
اسلام آباد ۔ 28 جنوری (اے پی پی) وزیر خارجہ مخدوم شاہ محمود قریشی ڈو ڈینھ دے اہم سرکاری دورے تے کینیا روانہ تھی گن جتھاں او “انگیج افریقہ معاشی سفارتکاری کانفرنس” اچ شرکت کریسن۔ مشیر تجارت عبدالرزاق داﺅد ایں کانفرنس دی سربراہی کریسن۔ پاکستان دی 100 دے نیڑے کاروباری شخصیات وی انہاں دے رلے ہن ۔ وزیر خارجہ کینیا دے صدر اتے وزیر خارجہ نال اہم ملاقاتاں کریسن ۔ افریقی ملکاں اچ تعینات پاکستانی سفیر وی کانفرنس اچ شریک تھیسن ۔وزارت خارجہ توں منگل کوں جاری بیان دے مطابق دورے تے روانگی دے موقع تے گال مہاڑ کریندے ہوئیں وزیرخارجہ شاہ محمود قریشی آکھیے جو ہک آزاد تے خود مختار خارجہ پالیسی کیتے معاشی استحکام لازم اے ۔ ایں مقصد کوں اگوں ودھونڑ کیتے وزارت خارجہ معاشی سفارت کاری کوں ہک اصول دے طور تے اپنائے تے اساں اگوں ودھدے پیوں ،انہاں آکھیے جو دفتر خارجہ اچ ہک معاشی سفارت کاری دے تحت “انگیج افریقہ” کانفرنس منعقد کروائی گی ہئی جیں دا افتتاح صدر پاکستان کیتا ہئی تے وزیر اعظم چھیکڑی تقریب نال خطاب کیتا ہئی جیں اچ ہک واضح سمت دا تعین تھی گیا ۔ افریقہ ہک ایجھا براعظم اے جیں اچ 54 ملک ہن تے بہوں سارے وسائل موجود ہن ۔ اتھاں تجارت تے سرمایہ کارے دے بہوں سارے موقع موجود ہن ۔انہاں آکھیے جو ماضی اچ افریقہ دے پاسے اساں او توجہ نی ڈتی جیرھی اساکوں ڈیونڑیں چاہیدی ہئی لہذا حکمت عملی کوں بدال تے اساں افریقہ دے پاسے توجہ کراونڑ دا فیصلہ کیتا ،ایں حکمت عملی کوں اگوں ودھاونڑ کیتے کینیا روانہ تھیندا پیاں جتھاں ڈو ڈینھ وار “انگیج افریقہ، معاشی سفارتکاری کانفرنس اچ شرکت کریساں ۔انہاں آکھیے جوکانفرنس اچ اساں افریقہ دی اہم کاروباری شخصیات کوں وی سڈیے تے کوشش اے جو اساں گال مہاڑ دے ذریعے افریقہ اچ اپنڑی رسئی کوں ودھاﺅں ۔ایں کانفرنس اچ افریقی ملکاں اچ جتے وی اساڈے سفیر ہن او شریک تھیندے پن امید اے جو ایں کانفرنس نال پاکستان کیتے چنگے ثمرات سامنڑے آسن ۔
