اسلام آباد ۔ 8 جنوری (اے پی پی) کابینہ دی اقتصادی رابطہ کمیٹی چار فریقی گیس پائپ لائن (تاپی) توں ملنڑآلی گیس دی قیمت دے تعین کیتے کمیٹی بنڑاونڑ، پاکستان ٹور ازم ڈویلپمنٹ انڈوومنٹ فنڈ دے قیام کیتے ہک ارب روپے دی ضمنی تکنیکی گرانٹ اتے نیشنل بنک ولوں یوٹیلٹی سٹورز کارپوریشن کوں 5 ارب روپے داقرض ڈیونڑ کیتے حکومت پاکستان دی ضمانت دی منظوری ڈتی اے۔کابینہ دی اقتصادی رابطہ کمیٹی دے اجلاس دی اگوانڑی وزیراعظم دے مشیر برائے خزانہ و محصولات ڈاکٹر عبدالحفیظ شیخ دی صدارت اچ تھئے۔ اجلاس اچ پی جی این آئی جیز رزق گیس فیلڈ توں سوئی سدرن کوں گیس ڈیونڑ دی منظوری ڈتی گئی، رزق 3 تے ڈرلنگ جاری اے ،ایندے نال بئی 10 ایم ایم سی ایف ڈی گیس دی پیداوار متوقع اے جتھودی گیس دی قیمت دا تعین پٹرولیم پالیسی دے مطابق تھیسی۔ اجلاس اچ چار فریقی گیس پائپ لائن منصوبہ (تاپی)کیتے قیمتاں دے تعین سانگے مذاکراتی کمیٹی دے قیام دی منظوری ڈتی گئی جیندے چیئرمین سیکرٹری توانائی (پٹرولیم ڈویژن)ہوسن اتے ارکان اچ سیکرٹری خزانہ یا انہاں دے نامزد کردہ عہدیدار ‘ وزارت توانائی دے جائنٹ سیکرٹری‘ ڈائریکٹر جنرل گیس اتے سوئی سدرن دے منیجنگ ڈائریکٹر ارکان ہوسن۔ پاکستان سٹیل ملز دے ذمہ گیس بلاں دی مد اچ سوئی سدرن کوں واجب الادا 3.02 ارب روپے سانگے وزارت صنعت و پیداوار دی ڈیمانڈ تے ای سی سی سیکرٹری خزانہ دی سربراہی اچ ترائے رکنی کمیٹی بنڑاونڑ دی ہدایت کیتی اے۔
