اسلام آباد ۔ 24 فروری (اے پی پی سرائیکی نیوز سروس)سرائیکی فاﺅنڈیشن پاکستان ولوں چوتھی سالانہ سرائیکی کلچرل کانفرنس جھوک فرید چولستان اچ تھئی۔کانفرنس دی صدارت چیئرمین سرائیکی فاﺅنڈیشن جام اظہر مراد لاڑ کیتی جڈانجو کانفرنس اچ سرائیکی فاﺅنڈیشن دے چیئرمین جام اظہر مراد سمیت بے سرائیکی رہنماءظہور دھریجہ،مجاہد جتوئی،احمد خان کانجو ایڈووکیٹ،راشد عزیز بھٹہ،ریاض حسین کھرل،جام فیض اللہ،لالہ اقبال بلوچ،عالم گیر خان سمیت بے رہنماواں خطاب کیتا اتے آکھیا جو سرائیکی صوبے بارے جمہوری اداریاں نال مایوسی،افواج پاکستان دا قومی ادارہ اے،سرائیکی قوم افواج پاکستان توں اپیل کریندی اے جو سرائیکی قوم کوں سرائیکی صوبے سمیت سارے حقوق ڈتے ونجن۔انہاں آکھیاجو سیاستداناں وسیب دے لوکاں کوں یکا دھوکہ ڈتے۔آندے الیکشن اچ صوبے دا لالی پاپ ڈیونڑ آلیاں کوں قوم مسترد کر ڈیسی۔سرائیکی کلچرل کانفرنس دے چھیکڑ اچ سائیکی فاﺅنڈیشن دے چیئرمین جام اظہر مراد قرارداداں وی پیش کیتی جئیں اچ 23ضلعیاں دا باقی صوبیاں وانگوں لسانی اتے ثقافتی بنیاداں اتے انج صوبہ سرائیکستان بنڑایا ونجے۔چولستان اچ مختلف علاقیاں اچ کالجز اتے بین الاقوامی سطح دی چولستان یونیورسٹی بنڑائی ونجے،پرائمری تئیں پورے وسیب اچ ابتدائی مادری زبان اچ تعلیم سرائیکی اچ ڈتی ونج۔چولستان اچ ناجائز الاٹمنٹ ختم کر تے زمیناں مقامی لوکاں کوں ڈتی ونجن۔چولستان کوں انج ضلعی حیثیت ڈتی انجے جئیں دا ضلع ہیڈ کوارٹر ڈیراور اتے باقی اہم چولستان دے علاقیاں کوں تحصیل دا درجہ ڈتا ونجے۔وسیب اچ وسنڑ آلی منیارٹیز کوں سماجی،سیاسی،معاشی اتے معاشرتی حقوق ڈتے ویسن۔حکومت سرائیکی وسیب دے کلچرل اتے تاریخی جہیں کوں عالمی سطح تے متعارف کراونڑ سانگے اقدامات کرے۔حکومت چولستان اتے وسیب دی دستکاری کوں انٹرنیشنل سطح تے فروغ ڈیووے۔سرائیکی کلچرل کانفرنس اچ سرائیکی گلوکار اجمل ساجد،شاعر جمشید کمتر اتے تحریکی خدمات تے بیجل داس کوں ایوارڈ وی ڈتے گئے۔کانفرنس اچ چولستانی لوک فنکار آڈوو بھگت,موہن بھگت,ہوشو شیدی,عابد حسین عابد,غلام مرتضی ان کھٹ,نازک فریدی,عمران اسد,بے شعراءکرام کلام سنڑایا۔کانفرنس نال غلام مصطفی مظہر,جام سلیم سعیدی,عابد حسین چانڈیہ,نتھو شاہین,جام آصف,دلشاد خان چانڈیہ,صدیق گھنیہ,سمیت بے لوکاں وی خطاب کیتا۔