اقوام متحدہ بھارت دے حالات دا نوٹس نہ گھدا تاں عالمی امن کوں بہوں خطرہ تھی سگدے،وزیراعظم عمران خان داپاکستان اچ مقیم افغان مہاجرین بارے عالمی کانفرنس نال خطاب

اسلام آباد ۔ 17 فروری (اے پی پی) وزیراعظم عمران خان آکھیا جو بہوں اوکھے معاشی حالات دے باوجود پاکستان افغان مہاجرین دی میزبانی کیتی اے،ساری اوکھ دے باوجود افغانستان مہاجرین دی میزبانی جاری رکھی اے،مغربی دنیا اچ اسلاموفوبیا مسلمان مہاجرین دے مسئلے بہوں ودھا ڈتن،مودی حکومت نازی فلسفے کوں پروان چڑھیندی پی اے،اقوام متحدہ بھارت دے حالات دا نوٹس نہ گھدا تاں عالمی امن کوں بہوں خطرہ تھی سگدے۔اے گالھیں انہاں سنوار کوں پاکستان اچ40 سال توں مقیم افغان مہاجرین بارے عالمی کانفرنس نال خطاب کریندے پے ہن۔ایں موقع تے اقوام متحدہ دے سیکرٹری جنرل انتونیوگوتریس، مہاجرین سانگے اقوام متحدہ دی ہائی کمشنر فلپو گرینڈی سمیت اہم ملکی اتے عالمی شخصیات موجودہن۔انہاں آکھیا جو پاکستان دے معاشی حالات بہتر نہ تھیونڑ پاروں عوام سانگے بہوں اوکھے رہین اتے پاکستان ولا وی افغانستان مہاجرین دی میزبانی جاری رکھی۔انہاں آکھیا جو افغان مہاجرین دے بالاں پاکستان اچ رہندیں ہوئیں کرکٹ سکھی اتے اج افغانستان دی کرکٹ ٹیم عالمی درجہ بندی اچ رل گئی اے جئیں گزریل ڈینھ پاکستان دی انڈر 19کرکٹ ٹیم کوں وی ہرائے۔انہاں آکھیا جو جڈاں رسول پاک مکہ توں مدینہ ہجرت کیتی تاں انصار د اجذبہ مثالی ہئی ،انہاں مہاجرین دی ہر طرح دی مدد اتے تعاون کیتا۔وزیراعظم آکھیا جو اللہ پاک قرآن مجید دے ذریعے اساکوں انسانیت تے رحم دا درس ڈیندے اتے اسلام اچ صرف مسلماناں دے حقوق دے احترام دا درس ای نی ڈتا ویندا جڈانجو انسانیت دی وی عزت تے احترام کوں بہوں مقدم آکھیا گے۔انہاں آکھیا جو ،اقوام متحدہ بھارت دے حالات دا نوٹس نہ گھدا تاں عالمی امن کوں بہوں خطرہ تھی سگدے۔