اسلام آباد ۔ 25 فروری (اے پی پی) انڈس کلچر فورم ہک وکھرا ادارہ اے جیڑھا جو مختلف ہم خیال لوکاں دا ہک مجموعہ اے،جئیں اچ سیاسی ورکرز اتے مختلف جابز کرنڑ آلے لوک کم کریندے پن۔انڈس کلچر فورم مادری زباناں دے ودھارے سانگے ہک بہترین پلیٹ فارم اے۔اے پی پی سرائیکی سروس نال گالھ مہاڑ کریندیں ہوئیں ڈاکٹر منظور ویسریوآکھیا جو خطے دی جیڑھی زباناں کوں نظر انداز کیتا گئے انہاں سانگے ایں بہوں سوہنڑاں پلیٹ فارم اے،انہاںزباناں کوں وفاق اچ گھن آ کراہیں انہاں دی زباناں اچ چھپی کتاباں دی گنڈھ کھلائی،انہاں زباناں تے گالھ کرنڑ انڈس کلچر فورم ولوں بہوں چنگا کم اے۔انہاں آکھیا انہاں زباناں تے گالھ کرنڑ یا ایں بارے سوچنڑ وی گناہ کبیرہ سمجھیا ویندا ہئی پرایں پلیٹ فارم نال انہاں زباناں دے بولنڑ آلیاں سانگے اتے پالیسی میکرز سانگے سوچنڑ دا ہک پلیٹ فارم بنڑایا گئے اتے ایں پلیٹ فارم توں ہنڑ لوک اگوں امدے پئن اتے اپنڑی ماءبولی بارے گالھ کریندے پن۔انہاں آکھیا جو زبان اساڈا قیمتی سرمایہ اے،پاکستان دیاں زبانہ ہک گلدستہ ہن جئیں اچ ہر زبان دا اپنڑاں رنگ،اپنڑی خوشبو اتے ہر زبان اپنڑے کلچر،ثقافت اتے اپنڑی قوم دی نمائندگی کریندی اے۔انہاںآکھیا جو ہزاریں سالیں توں موجود انہاں زباناں کوں اگوں گھن تے آونڑاں پمسی،انہاں دی ترقی تے گالھ کرنڑ نال پاکستان وی مضبوط تھیسی ۔کوئی زبان کہیں توں گھٹ کائنی،ایں بارے جیڑھا ڈر خوف اے او مُک ویسی۔انہاں چھیکڑ اچ آکھیا جواے پلیٹ فارم بہوں سوہنڑاں کم اے اتے ایں کوں ودھ چڑھ تے پذیرائی ڈیونڑی چاہیدی اے۔
