وزیراعظم عمران عوام کوں ریلف ڈیونڑ دے اقدامات تے ودھ توجہ ڈیندے پین،تونسہ شریف اچ عوامی منصوبیاں سانگے سارے وسائل ڈتے ویسن، جہانگیر خان ترین دی رکن اسمبلی خواجہ شیراز محمد نال ملاقات اچ گالھ مہاڑ

اسلام آباد۔ 11 فروری (اے پی پی)تحریک انصاف دے مرکزی رہنما جہانگیر خان ترین آکھیے جو وزیراعظم عمران خان معیشت سنبھلنڑ توں بعد ہنڑ عوام کوں ریلف ڈیونڑ دے اقدامات تے ودھ توجہ ڈیندے پین،تونسہ شریف اچ عوامی فلاح دے ترقیاتی منصوبیاں دی تکمیل سانگے سارے وسائل ڈتے ویسن،لوکاں کوں تیکھے ریلیف ملنڑ ڈسنڑ پئے ویسی۔اے گالھ انہاں تحریک انصاف دے رکن قومی اسمبلی اتے پبلک اکاونٹس کمیٹی دے ممبرخواجہ شیراز محمودنال اسلام آباد اچ ملنڑ ویلھے آکھی۔خواجہ شیرازمحمود جہانگیر ترین کوں اپنڑے حلقے دے مسائل ڈسائن اتے انہاں دے حل کیتے تجویزاں پیش کیتن۔خواجہ شیرازمحمود تونسہ شریف دے حلقہ اچ جاری منصوبیاں تے الوائےاتے ودھ فنڈز ڈیونڑ تے وفاقی و صوبائی حکومت دا شکریہ ادا aکیتے۔ایں موقع تے جہانگیر ترین یقین ڈیوایا جو انہاں تجویزاں تے عمل کیتا ویسی اتے تونسہ شریف اچ عوامی فلاح دے ترقیاتی منصوبیاں دی تکمیل سانگے سارے وسائل ڈتے ویسن کیوں جو وزیراعظم عمران خان ملکی معیشت دے تکڑا تھیونڑ توں بعد ہنڑ عوام کوں سوکھ ڈیونڑ کیتے اپنڑے وعدے تے عملدرآمد سانگے فوری اتے ہنگامی اقدامات دی ہدایت کیتی اے۔جہانگیر خان ترین عوامی مسلیاں دے حل اچ دلچسپی اتے ہر ویلھے عوام نال روابط رکھنڑ تے رکن قومی اسمبلی خواجہ شیراز محمود دے جذبہ خدمت دی تعریف کیتی۔