پاکستان اوکھ اچوں نکل آئے،قوم کوں جلدی خوشخبریاں ملسن ،وزیراعظم عمران خان دا لیہ اچ احساس اثاثہ جات منتقلی پروگرام دے اجراءدی تقریب نال خطاب

لیہ ۔ 21 فروری (اے پی پی)وزیراعظم عمران خان آکھیا جو پاکستان اوکھ اچوں نکل آئے،قوم کوں جلدی خوشخبریاں ملسن ،گزریل حکومتاں دے گھدے ہوئے قرضے دی قسطاں ویلھے تے واپسی نہ کریندے تاں ملک دیوالیہ تھی ویندا،تعلیم،صحت،انصاف اتے تھانڑے دا نظام بہتر کریندے پیوں،80ہزار لوکاں کوں ہر مہینے بلاسود قرضے اتے 50ہزار غریب نینگراں کوں ہر سال سکالرشپس ڈتی ویسن،پورے ملک اچوں مزدور اتے غریب طبقے کوں چھت اتے خوراک ڈیونڑ سانگے پناہ گاہواں بنڑیندے پیوں،غریب اتے امیر سانگے ہکوسواں نصاب گھد ی امدوں،استادیں سانگے جزااتے سزا دا نطام گھدی امدوں،کرنٹ اکاﺅنٹ خسارہ ہک سال اچ 75فیصد گھٹ گئے ،روپیہ ٹک گئے ،سٹاک مارکیٹ اچ بہتری آئی اے،باہرلی سرمایہ کاری شروع تھئی اے۔جمعے کوں لیہ اچ احساس اثاثہ جات منتقلی پروگرام دے اجراءدی تقریب نال خطاب کریندیںہوئیں انہاں آکھیا جو اساڈی کوشش اے جو پاکستان کوں ہک فلاحی ریاست بنڑاﺅ،پاکستان ا چ ہنڑ تئیں تھیونڑ آلی ترقی اچ امیر،امیر اتے غریب غریب تھیندا پے۔انہاں آکھیا جو کوئی وی معاشرہ ایں صورتحال اچ ترقی نی کر سگدا،مدینہ دی ریاست نبی اکرم ایں اصول تے بنڑائی اتے لوکاں کوں غریبی توں کڈھ کراہیں مسلماناں کوں ہک عظیم قوم بنڑایا،چین 30سالیں اچ 70کروڑ لوکاں کوں غربت اوں کڈھیے۔ایں سانگے او عظیم ملک بنڑ گئے ۔انہاں آکھیا جو ایں زبردست پروگرام تے ثانیہ نشتر کوں مبارکباد ڈینداں اتے آکھیا جو ایں پروگرام نال تریمتیں کوں اپنڑی زندگی سوکھی کرنڑ دا موقع ملسی۔انہاں آکھیا جو او جیڑھا کجھ وی ہن او اپنڑی اماں پاروں ہن،اساں پاکستان دی ماواں دی مدد کرنڑی اے تانجو او خود اتے اپنڑے ٹبر کوں سوکھا کر سگن۔ایں موقع تے وزیراعلیٰ پنجاب عثمان بزدار اتے وزیراعظم دی معاون خصوصی برائے تخفیف غربت تے سماجی تحفظ ڈاکٹر ثانیہ نشتر وی تقریب نال خطاب کیتا۔ایں موقع تے وزیراعظم مستحقین اچ منجھیں،گﺅیں،اتے بکریاں وی تقسیم کیتی۔