اسلام آباد۔ 25 فروری (اے پی پی) زباناں دا ودھارااتے تحفظ اجوکی لوڑھ اے،زبان ساڈی قدیم تہذیبی قدراں، علم اتے ذہانت دامرکز اے،زبان دی بنیاد تے ہی قوماں، گروہاں اتے قبیلاں دی سنجانڑ تھیندی اے،سرائیکی زبان و ادب دے ودھارے کیتے رل مل تے کم کرنڑاں ہوسی۔اے گال پاکستان نیشنل کونسل آف دی آرٹس اسلام آباداچ انڈس فورم ولوں “مادری زباناں دے عالمی ڈینھ“ سانگے سرائیکی ادبی اکیڈمی دے آدر نال سرائیکی وسیب توں آئے سرائیکی اہل قلم ،ادیباں دانشوراں دے اعزازاچ “سرائیکی بیٹھک” ویلھے کیتی گئی۔ایں سوہنڑی تقریب دی صدارت سینئر صحافی مظہر عارف کیتی۔مہمانِ خصوصی مشتاق لاشاری اتے مہمان اعزاز چیئرمین سرائیکی سٹڈی ایریا بہاءالدین زکریا یونیورسٹی ممتاز کلیانی ہن جڈاں جو نثر نگار عبدالباسط بھٹی، معروف شاعر جہانگیر مخلص، سلیم شہزاد، اظہر کلیانی ، یونس فادر عالم، ارشاد امین، خورشید احمد، سمیع اللہ بزدار، حبیب جعفری، صابر ملک ، شاہد دھریجہ۔امجد نذیر،ارشاد بخاری، رانا ابرار،جمشید اقبال،محبوب دستی اتے بئے مہاندرے سرائیکی اگوانڑاں شرکت کیتی۔سینئر صحافی مظہر عارف آکھیے جو جگ اچ قوماں دی سنجانڑ اتے پرکھ ایندی زبان اتے ثقافتی اقدار نال تھیندی اے،کیوں جو ایندے نال اساں اپنڑا جیونڑ سدھارنڑ کیتے اپنڑے خیالات اتے احساسات بئے تئیں پچا سگدے ہیں۔لندن توںا ٓئے مہاندرے مہمان مشتاق لاشاری آکھیا جو سرائیکی تحریک اچ وی تحرک پیدا کرنڑ دی لوڑھ اے،ایں سانگے ساریاں سرائیکی پارٹیاں کوں مل بیھ تے حکمت عملی بنڑاونڑی ہوسی،اصلاحی تحریکاں جڑت ڈیندن ترڑینداںنئیں،ساکوں مل تے کم کرنڑ دی لوڑھ اے۔ سرائیکی سٹڈی ایریا سنٹردے چیئرمین ممتاز کلیانی آکھیے جو سرائیکی وسیب اچ لوکاں کوں موقع ڈیونڑا ہوسی جو اوآپ بغیر کہیں دباو دے منن جو ایمانداری نال زبان دی ترقی اچ ہتھ ونڈیسن،ایں زبان اچ لکھنڑاتے بولنڑ آلیاں کوں وقار ڈیونڑاں ہوسی۔صدرسرائیکی ادبی اکیڈمی ڈاکٹر سعدیہ کمال آکھیا جو ساڈی زبان جیندی اے،اساں جدت اتے ترقی دے پھیر اچ اپنڑی ما بولی اتے ثقافت دی سنجانڑ مکیندے ویندے ہیں،اپنڑی زبان دا تحفظ کرنڑاہوسی،ایندے لوظاں کوں آندی نسل دو منتقل کرنڑا ہوسی،جیویں جو حکومتاں وی ایندی ترویج تے کوئی دید نئیں بھالی،صرف اردو اتے پنجابی کیتے ہی کجھ کم تھئے بھل پاکستان دیاں ساریاں زباناں ساریاں ساڈیاں زباناں ہونڑا چاہیدن،اے سڈاے باغ داسوہنڑپ ہین جیکوں اساں آپ پھلنڑے۔
