چین ،کورونا وائرس پاروں ہلاک تھیونڑ آلیں دی تعداد 425 تھی گئی ، مریضاں دی تعداد 20 ہزارتوں ودھ

بیجنگ۔ 4 فروری (اے پی پی) چین اچ کورونا وائرس پاروں ہلاک تھیونڑ آلے لوکاں دی تعداد 425تھی گی اے جڈاں جو متاثرہ مریضاں دی تعداد 20ہزار توں ودھ گئی اے ۔منگل کوں چینی ہیلتھ کمشن ولوں جاری ہک بیان اچ ڈسایا گے جو صوبہ ہوبی اچ کورونا توں متاثرہ 64 لوکاں دی موت دے بعد ہنڑ تئیں کورونا وائرس نال ہلاک تھیونڑ آلے لوکاں دی کل تعداد 425تھی گئی اے تے مزید 2345لوکاں اچ کورونا وائرس دی تشخیص دے بعد متاثرہ مریضاں دی تعداد 20 ہزار توں اتے تھی گئی اے ۔چینی حکام دے مطابق ونزاﺅ شہر دے بعد مزید شہراں کوں لاک ڈاﺅن کر ڈتا گے جیں اچ شنگھائی توں175کلو میٹر اتے ہوبی توں 850 کلو میٹر پرے واقع شہر تائیژاﺅ وی شامل اے ،تائیژاﺅ صوبہ ہینگژاﺅ دا شہر اے جیں دے ہک ضلع اچ علی بالا دا صدر دفتر وی موجود اے ۔ایندے علاوہ منگل کوں چین دے خودمختار خطے مکاﺅ جیں دی معشیت دا 80 فیصد دارومدار جوئے خانیں دی آمدنی اتے اے ، ایندے اچ جوئے خانے (کسینو) عارضی طور تے بند کرنڑ دا اعلان کرڈتا گے ،مکاﺅ اچ سنوار کوں کورونا وائرس دا 10واں مریض سامنڑے آئے ۔