اساں قوم دی حیثیت نال کرونا وائرس دا مقابلہ کریسوں اتے ایندے خلاف جنگ جتسوں،وائرس توں پریشان تھیونڑ دی لوڑھ کائنی، وزیراعظم عمران خان دا قوم نال خطاب

اسلام آباد۔ 18 مارچ (اے پی پی) وزیراعظم عمران خان آکھیا جواساں قوم دی حیثیت نال کرونا وائرس دا مقابلہ کریسوں اتے ایندے خلاف جنگ جتسوں،وائرس توں پریشان تھیونڑ دی لوڑھ کائنی،اے وائرس ہک زکام اے جیڑھا تکھے کھنڈا پئے،کوروناوائرس نال 97فیصد مریض ٹھیک تھی ویندن،کورونا عالمی معیشت تے منفی اثرات پمدے پئن،معیشت دے منفی اثرات تے حکومت نظر لاتی ہوئی اے،بلوچستان دے ویران علاقے اچ اقدامات تے بلوچستان دی حکومت اتے پاک فوج دا کم تعریف دے قابل اے،وباءنال نبڑنڑ سانگے چین دے تجربے توں فائدہ چیسوں،ہیلتھ ورکرز اتے طبی عملے کوں سہولتاں ڈیسوں،باہرلے ملک پاکستانیاں دا احساس اے،چین دے شہر ووہان اچ رہنڑ آلے پاکستانی طلباءدی اوکھ وی جانڑدوں،ذخیرہ اندوزاں کوں خبردار کرینداں اتے انہاں دے خلاف سخت کاروائی کیتی ویسی،ریاست ذخیرہ اندوزاں کوں کوئی رعایت کائنا ڈیسی،کورونا توں بچنر سانگے شہر بند کرنڑ دی تجویز پاکستان دے حالات نال مقابت نی رکھیندی،عوام وباءتوں بچنڑ سانگے کہیں وی وڈے کٹھ اچ نہ ونجے،حفاظتی تدابیر اتے آگاہی مہم بارے علماءکرام اپنڑاں کردار نبھاون۔انہاں آکھیا جو پوری دنیا اچ ہنڑ تئیں ہک لکھ 90ہزار مریض وائرس دا شکار تھی گئن، اتےکوروناوائرس نال 97فیصد مریض ٹھیک تھی ویندن۔اے گالھیں انہاں منگل کوں قوم نال خطاب کریندیں ہوئیں آکھی۔انہاں آکھیا جو 15جنوری کوں اساں فیصلہ کیتا ہئی جو کوروناوائرس دے مسئلے نال نبڑنڑ سانگے کیا کرنڑاں چاہیدے،چین اچ جڈاں اے وائرس ہئی تاں ساکوں پتہ ہئی جو چین توں وی لوک پاکستان امسن۔انہاں آکھیا جووائرس توں پریشان تھیونڑ دی لوڑھ کائنی،اے وائرس ہک زکام اے جیڑھا تکھے کھنڈا پئے،کوروناوائرس نال 97فیصد مریض ٹھیک تھی ویندن اتے چار توں پنج فیصد لوکاں کوں ہسپتال ونجنڑاں پمدے۔وزیراعظم آکھیا جو اساں چین نال رابطے اچ ہیسے،ایران اچ قم شہر توں اے وباءشروع تھئی اے اتھاں پاکستان زائرین وی متاثر تھین،ایران دی حکومت نال وی اساڈا رابطہ اے اتے جیرھے زائرین بلوچستان دے رستے واپس امدے پئے ہجن انہاں کوں قرنطینہ اچ رکھیا گئے اتے ویران علاقے اچ سہولتاں ڈیونڑ ہک اوکھا کم ہئی پر ایں بارے بلوچستان دی حکومت اتے پاک فوج دا کم تعریف دے قابل اے۔انہاں آکھیا جو اساں دنیا دی صورتحال کوں وی ڈیکھدے پیسے۔15فروری دے بعد نو لکھ توں ودھ بندیاں دی ایئرپورٹس تے سکریینگ کیتی گئی اے،28فروری کوں کوروناوائرس دا پہلا کیس سامنڑے آیا،اساکوں اے اندازہ ہئی جو اے وائرس تکھے کھنڈ ویسی،گزریل ہفتے قومی سلامتی کمیٹی دا اجلاس تھیا اتے اوں ویلھے 20مریض تھی گئے ہن۔اساں اجلاس اچ دنیا دا ردعمل وی چیک کیتا،اٹلی ایں معاملے تے پہلے کجھ کائنا کیتا ہئی اتے اوں بعد اچ ملک کوں لاک ڈاﺅن کیتے،انہاں آکھیا جو اساں ڈے وی شہر بند کرنڑ دی تجویز ہئی جڈانجو پاکستان دے حالات امریکہ اتے یورپ توں وکھرے ہن،اساڈے ملک اچ غریبی اے اتے اساں معاشی اوکھ توں لنگھدے پئیوں،2019ءاساں سانگے اوکھا سال ہئی،بیروزگاری اتے مہانگ نال نبڑنڑ سانگے کم کریندے پیوں۔اساں سوچیا جو اگر اساں شہر بند کرڈیسوں تاں کورونا دی بجائے لوک بکھ نال مرویسن۔ایں سانگے اساں فیصلہ کیتا جو جتھاں زیادہ لوک کٹھے تھیندن جنہاں اچ کرکٹ میچ،سکول،کالجز اتے یونیورسٹیاں ہن اتھاں چھٹیاں کر ڈتیاں گئن۔انہاں آکھیا جو ایں صورتحال نال نبڑنڑ سانگے قومی رابطہ کمیٹی بنڑا ڈتی اے جیڑھی جو وزراءاعلیٰ نال رابطے اچ رہسی۔انہاں آکھیا جو اجوکی صورتحال اچ اساں آئی ایم ایف نال وی گالھ کریسوں کیونجو اساکوں اپنڑے معاشی شعبیاں کوں انہاں حالات اچ ریلیف ڈیونڑاں پمسی۔اقتصادی کمیٹی متاثر تھیے شعبیاں تے نظر رکھیسی اتے انہاں دی مدد سانگے تجویزاں ڈیسی،کمیٹی ڈیکھسی جو مہانگ نہ تھیوے اتے کھاونڑ پیونڑ دی شہیں سوکھی مل سگن۔انہاں آکھیا جو ذخیرہ اندواں کوں خبردار کرینداں جو انہاں دے خلاف سخت کاروائی کیتی ویسی اتے ریاست ذخیرہ اندوزاں نال کوئی رعایت کائنا کریسی اتے انہاں کوں سزا ڈتی ویسی۔وزیراعظم آکھیا جو کوروناوائرس دے خلاف کوئی وی حکومت عوام دی حمایت دے بغیر نی لڑ سگدی،اساں احتیاط کرنڑی اے،بخار،زکام اتے کھنگ تھیونڑ تے فوراً ٹیسٹ نہ کروایا ونجے۔امریکہ سمیت دنیا اچ کتھائیں وی اتنی تعداد اچ ٹیسٹ کراونڑ دی صلاحیت کائنی،کورونا وائرس توں گھبراونڑاں نی اتے احتیاط کرنڑی اے۔انہاں آکھیا جو باہروں آونڑ آلیاں کوں وی احتیاط کرنڑی پمسی کیونجو وائرس باہروں امدا پئے۔باہروں آونڑ آلیاں کوں ڈو ہفتے اچ پتہ لگ ویسی جو انہاں اچ وائرس دی علامات ہن یا کائنا۔انہاں آکھیا جو مسلمان دی حیثیت نال اساڈا ایمان اے جو زندگی اتے موت اللہ دے ہتھ اچ اے اتے حضور اکرم وی احتیاط کرنڑ دی تلقین کیتی اے اتے انہاں دا فرمان اے جو احتیاط کرو اگر تساں کوں ڈر اے جو تساڈا اُٹھ نہ بھج ونجے تاں پہلے اونکوں بدھ گھنو۔انہاں آکھیا جو ہیلتھ ورکرز،ڈاکٹراں اتے طبی عملے کورونا دے خلاف جہاد کرنڑے اتے اساں انہاں کوں سارے وسائل ڈیسوں۔وزیراعظم آکھیا جو انہاں دے خطاب دا مقصد قوم کوں کورونا کوں روکنڑ سانگے کیتے گئے اقدامات بارے اعتماد اچ گھنڑ اے۔کورونا دے معاملے تے افراتفری کھنڈاونڑ دی لوڑھ کائنی۔