اسلام آباد ۔ 10 مارچ (اے پی پی سرائیکی سروس) کہیں قوم دی ثقافت،تاریخ،فن اتے ادب اچ اوندی مادری زبان دا مرہون منت ہوندے،کہیں زبان دا ختم تھیونڑ دا مطلب اوندی ثقافت دا خاتمہ اے۔مادری زبان کہیں وی بندے دی او زبان ہوندی اے جیڑھی اونکوں اپنڑے گھر توں ورثے اچ ملدی اے،زباناں دے ختم تھیونڑ دا عمل اوں ویلھے شروع تھی ویندے جڈاں ماءپیو اپنڑے بالاں کوں مادری زبان نی سکھیندے۔اے گالھیں گزریل ڈینھ سرائیکی ادبی اکیڈمی اتے سرائیکی نیوز سروس (اے پی پی) ولوں ایسوسی ایٹس پریس آف پاکستان دے دفتر اچ 6مارچ سرائیکی ثقافتی ڈینھ دے موقع تے ”سرائیکی بیٹھک“اچ سرائیکی وسیب توں تعلق رکھنڑ آلی سرائیکی کمیونٹی دی مہان شخصیات کیتی۔جئیں دی صدارت کریسنٹ کلب دے رہنما سبطین رضا لودھی ، مہمان خصوصی ماہر قانون دان ارشد عزیز بھٹہ، دلاور عباس صدیقی جڈانجو مہمان اعزاز سینئر صحافی اتے اے پی پی نیوز سروس دی ریجنل زباناں دے انچارج حنیف صابر ہن،انہاں توں علاوہ سینئر صحافی خضر کلاسرا، رانا ابرار خالد، محمدنعیم خان ، عمران احمد اتے شاہد دھریجہ خصوصی طور شرکت کیتی۔ایںموقع تے تقریب دی میزبان انچارج سرائیکی نیوز سروس ڈاکٹر سعدیہ کمال معزز مزماناں کوں سرائیکی ثقافت دی سنجانڑ نیلے رنگ دی سرائیکی اجرک پوائی۔ایں موقع تے تقریب دے صدر کریسنٹ کلب دے رہنما سبطین رضا لودھی آکھیا جو سرائیکی وسیب صوفیاءدی دھرتی اے جتھاں امن ،محبت اتے بھائی چارے دا درس ملدے،سرائیکی اجرک سرائیکی وسیب دی سنجانڑ بنڑ گئی اے ،میں جتھ وی وینداں سرائیکی اجرک میڈے نال ہوندی اے۔مزمان خصوصی ماہر قانون دان ارشد عزیز بھٹہ آکھیا جو ختم تھیندی زباناں کوں جدید طریقیاں نال ریکارڈ سانبھ کراہیں اونکوں محفوظ بنڑاونڑ ضروری اے تانجو مستقبل اچ انہاں زباناں اتے اوندی نال جڑی تہذیب کوں سمجھنڑ اچ مدد ملسی۔دلاور عباس صدیقی آکھیا جو علاقائی مادری زباناں وکھرا انداز فکر اتے حسن رکھیندن۔مادری زباناں نہ صرف انسان دی سنجانڑ ہن جڈانجو بہوں قیمتی روایت وی رکھیندن۔اے پی پی ریجنل زباناں دے ڈائریکٹر تے سینئر صحافی حنیف صابر آکھیا جو مادری زباناں اچ گالھ کرنڑ اچ کیا مضائقہ اے،ایں اچ کیا شرمندگی اے؟اگر مادری زباناں کائنا الیسوں تاں اے ہولے ہولے مر ویسن اتے ایں دے نال ہزاراں سال دی ثقافت وی مر ویسی۔ایں دا سوکھا حل ملک اچ ودھ قوماں اچ زباناں کوں من گھنڑ اے۔کیونجو اے ماءدی زبان اے،ایں زبان اچ ماءبال کوں لوریاں ڈیندی اے۔سینئر صحافی خضر کلاسرا آکھیا جو لوک تاریخی اتے ثقافتی طور تے ہک ڈوجھے نال جڑین،تھل دے لوک سرائیکی صوبے سانگے بہوں دیر توں بھج دھرک لاتی ودن،انہاں دی سرائیکی صوبے سانگے جدوجہد لُکی ہوئی کائنی جڈانجو ملتان توں او محبت انہاں کوں کائنی ملی جئیں دے تھل دے لوک حق دار ہن۔سینئر صحافی رانا ابرار خالد آکھیا جو سرائیکی اجرک وسیب دی سنجانڑ بنڑ گئی اے اتے جاہ جاہ تے سرائیکی تقریباں تھیندیاں ُئن،سرائیکی اجرک سندھ اجرک دے مقابلے اچ نی جڈانجو اے وسیب دی سنجانڑ دے طور سامنڑے آئی اے۔سرائیکی ادبی اکیڈمی دی صدر ،سرائیکی نیوز سروس(اے پی پی) دی انچارج اتے تقریب دی میزبان ڈاکٹر سعدیہ کمال آکھیا جو سرائیکی اجرک دا ڈینھ خوشیاں دا ڈینھ اے،وسیب دے لوک پوری دنیا کوں امن دا سنھیا ڈیندے پئن۔سرائیکی اجرک دا نواں جنم وسیب دے سارے لوکاں کوں کٹھا کر ڈتے۔سرائیکی ادبی اکیڈمی دے جنرل سیکرٹری شاہد دھریجہ تقریب دی میزبانی کریندیں ہوئیں آکھیا جو سرائیکی کلچر شو جیڑھا جو سرائیکی خطے دا پرانڑاں تہوار اے 6مارچ کوں پورے سرائیکی وسیب اچ جوش و خروش نال منایا ویند پے۔صادق آباد توں ٹانک تئیں ہر کوئی نیلی رنگ دی اجرک پاتی ہوئی اے۔اج دا ڈینھ اساں سانگے عید وانگوں اے۔اساں پر امن لوک ہیسے اتے پوری دنیا کوں امن دا سنھیا ڈیندے پیوں۔
