ملتان۔08 مارچ (اے پی پی) وزیرخارجہ مخدوم شاہ محمود قریشی آکھیے جو جنوبی پنجاب صوبہ بنڑاونڑ ساڈے منشور دا حصہ اے،صوبہ ضرور بنڑسی،ایندے تے پیش رفت بارے وزیراعظم کوں آندے ہفتے بریفنگ ڈتی ویسی۔اے گالھ وزیرخارجہ مخدوم شاہ محمودقریشی ملتان اچ میڈیا نال گالھ مہاڑ اچ آکھی۔ انہاں آکھیا جو جنوبی پنجاب صوبہ دے حوالے نال ہنڑ تئیں کیتے گئے فیصلیاں بارے آندے ہفتے وزیراعظم کوں تفصیل ڈسائی ویسی،جے تئیں جنوبی پنجاب صوبہ نئیں بنڑدا او تئیں علاقے اچ سب سیکرٹریٹ قائم کرڈتا ویسی تاں جو لوکاں دے مسلے سوکھے حل تھیون۔ انہاں آکھیے جو جنوبی پنجاب سیکرٹریٹ بارے ملتان اتے بہاولپور دے ناواں تے اتفاق رائے پیدا کرنڑے،ایں سانگے پوری کوشش اے جو کہیں ہک ناں تے تیکھے اتفاق رائے تھی ونجے اتے تیکھے توں تیکھے جنوبی پنجاب سیکرٹریٹ کم شروع کر ڈیوے۔افغان امن بارے انہاں آکھیے جو امریکا طالبان معاہدے دے تحت افغانستان اچ قیدیاں دی راہئی تے پیش رفت تھیندی پئی اے،قیدیاں دی رہائی دے بعد اگو دا مرحلہ مختلف افغان گروپاں دے مذاکرات ہوسن تاں جو امن کوں عملی شکل ڈتی ونجے۔انہاں آکھیے جو افغانستان اچ امن دا راستہ اوکھا ضرور اے بھل ناممکن کائنی۔انہاں آکھیے جو مقبوضہ کشمیر دی صورتحال اتے بھارت اچ مسلماناں دی حالت تے افغانستان، ایران سودھا جیویں ترک صدر،ایرانی وزیرخارجہ اتے ایران دے سپریم لیڈر آیت اللہ خامنہ ای الوائے ایندے تے مشکور ہیں،عالمی برادری کوں ایندے تے تیکھے عملی اقدامات کرنڑے ہوسن،کشمیری اتے باھرتی مسلمان کلہے نئیں،پورے جگ دے مسلمان خاص کر پاکستان،ترکی، ایران انہاں دے نال کھڑن۔
