حریت رہنما یاسین ملک کوں ڈیتھ سیل اچ بیہمانہ تشدد دا نشانہ بنڑایا ویندا پئے ،مشال ملک دا بیان

اسلام آباد ۔ 20مارچ (اے پی پی) حریت رہنما یاسین ملک دی ذال مشال ملک آکھیے جو حریت رہنما یاسین ملک کوں ڈیتھ سیل اچ بیہمانہ تشدد دا نشانہ بنڑایا ویندا پئے، اتنا وڈا لیڈر تے مرد مجاہد یاسین ملک موت تے منہ اچ ہے۔ مشال ملک جمعے کوں اپنڑے ہک ویڈیو بیان اچ آکھیے جو یاسین ملک اپنڑی وصیت دنیا کوں بھجوا ڈتی اے ۔ انہاں واضح کرڈتے جو او کہیں صورت سرنڈر کائناں کریسن ۔ یاسین ملک اپنڑی موت دے بعد جسمانی اعضاءعطیہ کرنڑ دی وصیت وی کیتی اے ۔ مشال ملک آکھیے جو دلیر لیڈر موت دے بعد اپنڑاں جسم وی کشمیری قوم کیتے وقف کرڈتے ۔ کشمیریاں دی آزادی کیتے یاسین ملک آپ دی جوانی تے اپنڑاں خاندان قربان کرڈتے ۔انہاں آکھیے جو کہیں وی جدوجہد آزادی اچ اتنا وڈا ظلم کائنی تھیا جتنا کشمیر اچ تھیندا پئے ۔انہاں آکھیے اگر ہک یاسین ملک کوں شہید کیتا گیا تاں پوری دنیا اچ سینکڑاں یاسین ملک سامنڑے آسن ۔