اسلام آباد ۔ 26 مارچ (اے پی پی) پاکستان مقبوضہ کشمیر اچ جاری مواصلاتی بندش تے ودھ ساری تشویش دا اظہار کریندے ہوئیں بھارت تے زور ڈتے جو بھارتی حکومت کورونا وائرس دے خطرے دے پیش نظر مقبوضہ وادی اچ مواصلاتی بندش وختی مکاوے تے اتھاں میڈیکل ٹیماں کوں ونجنڑ تے سپلائی ڈیونڑ دی اجازت ڈیوے ۔ خمیس کوں ہفتہ وار بریفنگ دے دوران ترجمان دفتر خارجہ عائشہ فاروقی آکھیے جو بھارتی حکومت کشمیریاں کوں انفارمیشن دے حق اتے کورونا وبا نال موثر انداز اچ نبڑنڑ کیتے ناگزیر دوائیں تے طبی سہولتاں توں محروم کرڈتے جیرھا جو انسانی حقوق دی سنگین خلاف ورزی اے۔ ترجمان دفتر خارجہ عائشہ فاروقی آکھیے جو پاکستان اچ کورونا وائرس نال نبڑنڑ دی منصوبہ بندی کر گھدی گئی اے ۔ دفتر خارجہ دی ترجمان عائشہ فاروقی دے مطابق وزیر خارجہ شاہ محمود قریشی ایران دی مشکلات بارے وی بئے وزرائے خارجہ کوں ڈسائے ۔ پاکستان پوری دنیا اچ کورونا پاروں تھیونڑ آلیاں موتاں تے ڈکھ دا اظہار کیتے ۔ ترجمان دفتر خارجہ آکھیے جو وزیر خارجہ شاہ محمود قریشی اجوکے ڈینھاں سارک ملکاںدے وزراءخارجہ نال ٹیلی فونک رابطے اچ سارک عمل اچ پاکستان دے عزم دا اعاد کیتے۔ وزیر خارجہ کورونا وائرس نال نبڑنڑ کیتے سارک وزارءصحت ویڈیو کانفرنس دے انعقاد دی تجویز وی ڈتی۔ ترجمان آکھیے جو پوری دنیا دے مختلف ملکاں اچ پھسیے پاکستانیاں دا تحفظ اتے انہاں دی وختی وطن واپسی کوں یقینی بنڑاونڑ باہرلے ملک پاکستانی مشنز دی ترجیح اے ۔
