اسلام آباد ۔ 18 مارچ (اے پی پی) کابینہ دی اقتصادی رابطہ کمیٹی پی ایس او کوں ہدایت کیتی اے جو ایل این جی دی درآمد تے بندرگاہ دے استعمال دے اخراجات دی مد اچ پورٹ قاسم اتھارٹی کوں 1.696 ارب روپے دے واجبات 10 مساوی قسطاں اچ ڈتے ویسن۔ ای سی سی پاکستان ریزز ریونیو پروگرام دے تحت ایف بی آرکیتے 4.152 ارب روپے اتے اسلام آبادکیتے 44.44 ملین روپے دی تکنیکی ضمنی گرانٹس دی منظوری وی ڈتی ، ایں گرانٹ نال اسلام آباد کیپٹل ٹیریٹری دی حدود اچ نیشنل پروگرام اتے امپرومنٹ واٹر کورس فیز ٹو، گندم دی پیداوارودھاونڑ، وزیراعظم دے پروگرام سیو دی کالف اتے مرغبانی دے پروگراماں تے عملدرآمدکیتے استعمال کیتاویسی۔اے فیصلہ وزیراعظم دے مشیر برائے خزانہ و محصولات ڈاکٹر عبدالحفیظ شیخ دے زیر صدارت اجلاس اچ کیتا گئے۔اجلاس اچ وزارت سمندر پار پاکستانیز و ترقی انسانی وسائل بیرون ممالک روزگار کیتے ٹاسک فورس اتے سمندر پار پاکستانیاں دی فلاح و بہبود سانگے تفصیلی پریزنٹیشن ڈتی۔وزیراعظم دے معاون خصوصی سیّد زلفی بخاری اجلاس کوں اہم معاملیاں اتے تجویزاں تے تفصیلی بریفنگ ڈتی۔ڈاکٹر عبدالحفیظ شیخ کمیٹی کوں بجت دے ہک مہینے بعد ولا ای سی سی اچ آونڑ اتے کمیٹی ولوں سمندر پار پاکستانیاں دی فلاح و بہبوددے اقدامات تے پیش رفت کیتے تفصیلی بریفنگ ڈیونڑ دی ہدایت کیتی۔
