اسلام آباد۔ 20 مارچ (اے پی پی)وزیراعظم عمران خان آکھیے جوکورونا توں ڈرنڑ یا افراتفری دی لوڑنئیں ،لوک کرونا توں بچنڑ کیتے سماجی فاصلے ودھاون،ہک بئے دا ہتھ ونڈایا ونجے اتے میڈیا ایندے کیتے اپنڑی ذمہ واری نبھاوے، اساں صرف بطور حکومت نئیں بحیثیت قوم ہی کورونا دے خلاف جیت سگدے ہیں۔ اے گالھ وزیراعظم عمران خان اسلام آباد اچ سینئر صحافیاں نال گالھ مہاڑاچ آکھی انہاں آکھیا جو کورونا وائرس دے خطرات دے باوجود ملک کوں مکمل طورتے لاک ڈاون نسے کر سگدے،قوم اتے میڈیا توں اپیل اے جو او افرا تفری نہ پھیلاون کیوں جو ایندے نال ملک اچ بیا نقصان تھیونڑ دا اندیشہ اے، اساں کورونا دے معاملے دی روزانہ دی بنیاد تے مانیٹرنگ کریسوں ،ایں سانگے چین اتے پورے جگ دے تجربیاں توں فیدہ چاتا ویندا پئے، احتیاط اتے بنھاں ملکاں توں سکھنڑ نال ہی ایں بیماریا نال نبڑیا ونج سگدے بھل ایندے کیتے جیڑھی وی صورتحال ہوسی عوام کوں اوندے بارے آگاہ رکھیسوں۔وزیراعظم آکھیے جو جنوری اچ چین اچ اے وبا کھنڈنر دے بعد ہی اساں وی ایندے تے مسلسل اکھ رکھی ہوئی ہئی،چینی حکومت نال مسلسل رابطہ رکھیے، حفاظتی اقدامات کیتن،چین اچ پاکستانی طلبہ کون نہ گھن آونڑ دا فیصلہ کیتاگئے بھل جڈاں ایران توں زائرین آونڑ لگن تاں ساڈے کولو وی حالات وگڑ گین،ایں سانگے وفاقی اتے بلوچستان حکومت ویلھے تے اقدامات کیتن۔ انہاں آکھیے جو کورونا دے صورتحال تے ہک بئے تے الزام لاونڑ نال مسلہ حل نئیں تھینداایند ے کیتے رل مل تے ہک مٹھ تھی تے کم کرنڑ دی لوڑھ اے۔ انہاں عالمی برادری توں مطالبہ کیتے جو او ایران توں عالمی پابندیاں ہٹاوے،ایں وبا اچ پابندیاں بہوں وڈا ظلم ہین۔ وزیراعظم آکھیے جیکر لوک ڈیڈھ مہینے تئیں عوامی جاہیں تے نہ ونجن تاں بیماری تے قابو پاتا ونج سگدے، ڈوجھا جیکر بیماری دیاں علامات ظاہر تھیون تاں لوک رضاکارانہ طور تے آپ (قرنطینہ) لگے ونجن تاں جو اے بنھاں کوں ناں چمبڑے۔انہاں میڈیا کوں آکھیے جو او سننسی نہ کھنڈاون کیوں جو ایندے نال خوف آندے اتے لوک ڈر تے بئی خرابی کریندن،اساں اینجھے حالات ا چ پیمرا کوں ہدایات ڈیسوں جو او افراتفری اتے سنسنی نہ پھیلاون ڈیون۔
