اسلام آباد۔ 23 مارچ (اے پی پی) وزیراعظم دی معاون خصوصی برائے اطلاعات ونشریات ڈاکٹرفردوس عاشق اعوان آکھیے جو کورونا دے چیلنج نال نبڑن کیتے ساکوں قیام پاکستان دے جذبے االی کار کم کرنڑ دی لوڑھ اے،صوبیاں کوں جزوی لاک ڈاﺅن داآپشن ڈتا گیا ہا بھل ایندا مطلب زبردستی عوام کوں گھراں تئیں محدود کرنر نئیں،سندھ دے لاک ڈاﺅن سانگے فیصلے نال وفاقی حکومت اتفاق نئیں کریندی،اساں عوام کوں رضا کارانہ طورتے رلا تے کورونا دے خلاف جنگ جیتنڑ تے یقین رکھدے ہیں۔ اے گالھ انہاں اسلام آباد اچ پریس کانفرنس کریندے آکھی۔انہاں آکھیے جو ایں ویلھے بہوں وڈے پیمانے تے اتفاق دی لوڑھ اے،ڈنڈے دی تڈ تے اینجھے چیلنجز نال نئیں نبڑیا ونج سگدا۔انہاں آکھیے جو وزیراعظم دے خطاب توں بعد اے رائے سامنڑے آئی اے جو ملک کوں لاک ڈاون کرنڑا چاہیدے بھل وزیراعظم دا موقف واضح اے جو لوکاں کوں ڈنڈے دے زور نال کیویں مجبور کیتا ونج سگدے ،وزیر اعظم ساریاں صوبائی حکومتاں ، آزاد کشمیر ، گلگت بلتستان اتے اسلام آبادانتظامیہ نال 144اے دے تحت سمری بھجوائی اے ،صوبیاں کوں اے اختیار اے او جڈاں چاہوان فوج سڈا گھنن، کرونا دے خلاف جنگ اچ عوام سادا ہراول دستہ ہین ،ایندے اچ عوام دی مر ضی کوں ڈیکھنڑ وی لازم اے،وزیر اعظم عمران خان عوام کوں حقوق ڈیونڑ کیتے ردھیے ہوئن اتے انہاں کوں عوام دے اوکھ دا احساس اے۔فردوس عاشق اعوان آکھیے جو متحدہ قومی مومنٹ حکومت دی اہم اتحادی اے ، کورونا دے چیلینج نال نبڑن کیتے ایم کیو ایم دا ولا کابینہ اچ آونڑ ہک چنگاں فیصلہ اے،ایں اوکھے ویلھے جیڑھے سیاستدان الزام تراشیاں کریندے پین انہاں کوں چاہیدے جو اوخود ساختہ قرنطینہ چھوڑ تے سیاسی دکانداری چمکاونڑ توں باز راہون،حکومر نمبر بازی دی بجائے لوکاں کوں سوکھ دٰونڑ کیتے کم کریندی پئی اے،ایں قومی چیلنج نال نمٹنڑ کیتے سیاسی خواہشات ، مفادات اتے ایجنڈا کوں قرنطینہ اچ سٹ تے ہر کہیں کوں اپنڑا کردارادا کرنڑا چاہیدے۔انہاںا ٓکھیے جو حکومت سارے صوبیاں دی صلاح نال اقدامات کریندی پئی اے۔
