اسلام آباد ۔ یکم اپریل (اے پی پی) اینٹی۔ سموکنگ ایکسپرٹ اتے نائب صدر ”گرانٹ منیجمنٹ اینڈ ڈویلپمنٹ فاونڈیشن فار سموک فری ورلڈ (FSFW) ،ڈا کٹراحسن لطیف میڈیا نال خصوصی گال مہاڑ کریندے ہوئیں آکھیے جو پاکستان کوں سموکنگ فری بنڑاونڑ کیتے اساکوں رل تے کوششاں کرنڑیاں ہوسن ۔ انہاں آکھیے جو سگریٹ پیونڑ نال لوکاں دی صحت تے معاشرتی امور تے خوفناک اثرات تھیندے پئن ۔سگریٹ چھوڑ ڈیونڑ نال ہر بندے دی صحت تے چنگاں اثر تھیندے ۔ انہاں آکھیے جو سگریٹ براہ راست پھیپھڑیں کوں ضیان پجیندی اے ۔ ”اگر ہک سموکر سگریٹ نوشی چھوڑڈیندے تاں او جتھاں کینسر جیہی ڈراکلی بیماری توں خود کوں محفوظ کریندے اتھاں او ساہ، پھیپھڑیں اتے دل دیاں بیماریاں توں وی بچ ویندے۔ڈاکٹر احسن لطیف مزید آکھیے جو ڈٹھا گئے جو ہک سموکر کوں واک کریندے تے سیڑھیاں چڑھدے ساہ چڑھ ویندے تے او زیادہ دیر واک نی کر سگدا سگریٹ پیونڑ چھوڑ ڈیونڑ دے بعد او بندہ سوکھیں سیڑھیاں چڑھ ویندے تے پہلے دی نسبت دیر تئیں واک وی کرسگدے ۔انھاں افسوس دا اظہار کریندے ہوئیں آکھیے جو اساڈی نینگر نسل خصوصاً تعلیمی اداریں دے طالب علماں دی وڈی تعداد کوں سگریٹ پیونڑ اچ ملوث ڈٹھا گئے ۔انہاں آکھیے جو والدین تے استاداں کوں ایں گال تے نظر رکھنڑیں ہوسی جو بال سگریٹ تاں نئی پیندے اگر اینویں ہے تاں او وختی ایندا سدِباب کرن۔
