اساں اہل کشمیر دے نال ہک زبان تھی کراہیں مقبوضہ جموں تے کشمیر اچ آبادی دے تناسب نال چھیڑ چھاڑ دی تازہ بھارتی کوشش کوں مسترد کریندوں ،وزیراعظم عمران خان دا ٹویٹ
اسلام آباد ۔ 2 اپریل (اے پی پی)وزیراعظم عمران خان آکھیے جو اساں اہلِ کشمیر دے نال ہک زبان تھی کراہیں مقبوضہ جموں تے کشمیر اچ آبادی دے تناسب نال چھیڑ چھاڑ دی تازہ ترین بھارتی کوشش مسترد کریندوں۔ پاکستان ہندوستان دی ریاستی دہشتگردی اتے کشمیریاں کوں انہاں دے حقِ خوداردیت دی فراہمی توں انکار کوں دنیا دے سامنڑے عیاں کریندا رہ ویسی ۔خمیس کوں سماجی رابطے دی ویب سائٹ ٹویٹر تے ہک ٹویٹ اچ وزیراعظم آکھیے جو اجوکے غیر قانونی اقدام دا ویلھا وی قابل مذمت اے کیوں جو مودی سرکاری دنیا دی کرونا تے مرکوز توجہ توں ناجائز فائدہ چیندے ہوئیں BJP دی ہندوبالادستی دے ایجنڈے (ہندوتوا)کوں اگوں ودھاونڑ دی کوشش کریندی پئی اے ۔اقوام متحدہ/عالمی برادری بھارت دے ہتھوں سلامتی کونسل دیاں قراردادوں/عالمی قانون دی مسلسل پامالی روکن۔اساں ہندوبالادستی دے ایجنڈے تے کاربند نسل پرست مودی سرکاری ولوں بین الاقوامی قوانین اتے معاہدیں دی خلاف ورزی کریندے ہوئیں مقبوضہ جموں و کشمیراچ آبادی دا تناسب تبدیل کرنڑ دیاں کوششاں دی ودھ ساری مذمت کریندوں ۔ “جموں و کشمیر ری آرگنائزیشن آرڈر-2020” چوتھے جینیوا کنونشن دی واضح خلاف ورزی اے۔
