راولپنڈی ۔ 7 اپریل (اے پی پی) پاک فوج دے سربراہ جنرل قمر جاوید باجوہ آکھیے جو پرعزم نینگراں نال کورونا وائرس دے چیلنج نال نبڑسوں ،انشاءاللہ اوکھے حالات توں ہک قوم بنڑ تے نکل ویسوں، کور کمانڈرز کورونا وائرس دے خلاف جدوجہد اچ فرنٹ لائن تے خدمات سر انجام ڈیونڑ آلے ڈاکٹراں ، پیرا میڈیکس، طبی عملے اتے قانون نافذ کرنڑ آلے اداریں کوں خراج تحسین پیش کیتا۔ پاک فوج دے شعبہ تعلقات عامہ (آئی ایس پی آر) دے مطابق بری فوج دے سربراہ جنرل قمر جاوید باجوہ دی زیر صدارت 231ویں کور کمانڈرز کانفرنس منگل کوں راولپنڈی اچ منعقد تھئی ۔ کور کمانڈراں متعلقہ ہیڈکوارٹرز نال ویڈیو لنک دے ذریعے کور کمانڈر کانفرنس اچ حصہ گھدا ۔ فورم جیو سٹرٹیجک، علاقائی اتے قومی سلامتی دے ماحول دا جائزہ گھدا جیں اچ خاص طور تے کوویڈ۔19 نال پیدا تھیونڑ آلی تازہ ترین صورت حال تے غور کیتا گیا ۔ فورم پورے ملک اچ سول انتظامیہ کےتے پاک فوج دے دستیں دی تعیناتی دا جائزہ گھدا ۔ فورم کوں کوویڈ۔19 تے قابو پاونڑ کیتے قومی کوششاں کوں ہم آہنگی اتے واضح کرنڑ کیتے قائم کردہ نیشنل کمانڈ اینڈ آپریشن سینٹر دے امور بارے ڈسایا گئیا ۔ بری فوج دے سربراہ جنرل قمر جاوید باجوہ پاک فوج دے نینگراں دی عملی کوششاں دی تعریف کریندے ہوئیں سارے کمانڈراں کوں ہدایت کیتی جو گلگت بلتستان، آزاد جموں و کشمیر اتے اندرلے سندھ دے پرے دے علاقیں اچ لوکاں دی مشکلات گھٹ کرنڑ کیتے وسائل دی ترسیل اچ ودھ توں ودھ مدد کرن ۔ فورم کورونا وائرس دے خلاف جدوجہد اچ فرنٹ لائن تے خدمات سرانجام ڈیونڑ آلے ڈاکٹراں، پیرا میڈیکس، طبی عملے اتے قانون نافذ کرنڑ آلے اداریں کوں خراج تحسین پیش کیتا ۔فورم کشمیریاں کوں وی خراج تحسین پیش کیتا جیرھے بھارتی ظلم دے نال نال کورونا وبا دا مقابلہ کریندے ہوئیں حق خود ارادیت کیتے جدوجہد کریندے پئن ۔
