اسلام آباد ۔ یکم اپریل (اے پی پی) پاکستان سرائیکی پارٹی دی چیئرپرسن ڈاکٹر نخبہ تاج لنگاہ آکھیے جو حکومت سرائیکی خطے دے کساناں کوں ریلیف دے اجوکے ڈینھاں اچ سرائیکی علاقے اچ مینھ پاروں تھیونڑ آلیاں تباہ کاریاں نال فصلاں کوں ضیان تھئے، گڑھا وسنڑ پاروں فصلاں تباہ تھی گئن ۔کسان دا ایں ویلھے بہوں ضیان تھئے کساناں ساری جمع پونجی زراعت اچ لاڈتی اے ،ہنڑ سرائیکی خطے دا کسان معاشی بدحالی پاروں پریشان اے حکومت کوں چاہیدے جو او سرائیکی خطے دے کساناں دے زرعی قرضے معاف کرے تے حکومت کساناں کیتے خصوصی بیل آوٹ پیکج دا اعلان کرے تاں جو کسان طبقہ سنبھلنڑ دے قابل تھی سگے۔ڈاکٹر نخبہ تاج لنگاہ آکھیے جو اجوکے حکومتی پیکیج نال عوامی مسئلے حل نی تھی سگدے ۔ 1200 ارب دے پیکج اچ صرف 200 ارب روپے مزدوراں اتے مستحق طبقے کیتے رکھیے گئن جیرھے جو بہوں گھٹ ہن۔انہاں آکھیے جو ملک اچ ایں ویلھے بے چینی پاتی ویندی پئی اے تے ہر مقطبہ فکر دے لوک پریشان ہن ۔انہاں مزید آکھیے جو موجودہ حکومت پورے ملک اچ لاک ڈاﺅن کرڈتے مگر عوام دے مسئلے حل نئی تھئے ۔انہاں مطالبہ کیتے جو بحرانی کیفیت کوں سامنڑے رکھیندے ہوئیں بجلی دے گھریلوں صارفین کوں 2 مہینے دی پوری رعایت ڈتی ونجے ۔مزدور طبقے کوں 15000 ہزار روپے پجاونڑ دا بندوبست کیتا ونجے تے نادار طبقے کیتے راشن دا بندو بست کیتا ونجے ۔ڈاکٹر نخبہ تاج لنگاہ سرائیکی وسیب دے صاحب حیثیت لوکاں توں اپیل کیتی اے جو اوکھے ویلھے آپنڑے ہسمائیں اتے نادار لوکاں دی ہرطرح نال مدد کرن ۔
