اسلام آباد ۔ 6 اپریل (اے پی پی) وفاقی وزیر ریلویز شیخ رشید احمدآکھیے جو کورونا وائرس دے پیش نظر ملک اچ ریلوے دے مزدوراں اتے کارکناں دے تحفظ کوں یقینی بنڑاونڑ کیتے 5 ہزار ماسک ڈتے ویسن۔سنوار کوں پی ٹی وی نال گال مہاڑ کریندے ہوئیں انہاں آکھیے جو وزارت ریلوے ابتدائی طور تے 5ہزار ماسک دی تیاری دا ہدف رکھیے تے امید اے جو سویلے منگل کوں اے ماسک اتے سینی ٹائزرز ریلوے دیاں مختلف برانچاں نال تعلق رکھنڑ آلے عملے اچ ونڈیے ویسن ۔ وفاقی وزیر آکھیے جو ریلوے سٹیشناں دے مختلف دفتراں دے باہروں وی احتیاطی انتظامات دے حوالے نال ہدایات آویزاںکرڈتیاں ویسن ۔ انہاں آکھیے جو کورونا وائرس دے پیش نظراساں مزید 12 توں 14 وینٹیلیٹرز مل گھننڑ دا حکم ڈتے جیرھے سرکاری ملازمین کیتے پورے ملک دے سارے ریلوے ہسپتالاں اتے آئسولیشن سینٹرز اچ دستیاب ہوسن۔ وزیر ریلویز آکھیے جو وزارت کوڈ ۔19 مریضاں کیتے ریل گاڈی دیاں کوچاں کو آئسولیشن وارڈز اچ منتقل کیتے تے ریلوے انہاں مریضاں دے علاج معالجے کیتے صاف ستھرا اتے حفظان صحت دا ما حول ڈیسی ۔ انہاں مزید ڈسائے جو ریلوے دے قلیاں دیمالی مدد کیتے اساں انہاں دا پورا ڈیٹا احساس پروگرام کوں ڈیندے پیوں تے توقع اے جو انہاں کوں ترجیحی بنیاداں تے اے سہولت مل ویسی کیوں جو او ضرورت اے ایں ویلھے مستحق لوک ہن ۔انہاں آکھیے جو وفاقی حکومت مسافراں دی سہولت کیتے 15 اپریل توں کجھ ریل گاڈیاں چلا ڈیسی تاں جو انہاں کوںاپنڑے گھر پجنڑ دی سہولت ملے ۔
